ინფექციური საავადმყოფოს დირექტორი და კლინიკური ჯგუფის ხელმძღვანელი, თენგიზ ცერცვაძე აღნიშნავს, რომ ხალხის გარკვეული რაოდენობა, განსაკუთრებით ახალგაზრდები დემონსტრაციულად კოვიდს სხვადასხვა მიზეზით აიგნორებენ და რეგულაციებს არ იცავენ.

"ზოგს არ სჯერა კოვიდის არსებობის, ზოგი პოლიტიკურად ანგაჟირებულია და მიაჩნია, რომ, ვთქვათ, შეკრებაზე და მიტინგზე გასვლა გაცილებით მნიშვნელოვანია, ვიდრე კოვიდუსაფრთხოება. ზოგს უბრალოდ თვითდამკვიდრება და თავის გამოჩენა უნდა, რომ არაა მშიშარა და მას კოვიდი ვერაფერს დააკლებს. ეს არ არის მხოლოდ საქართველოს მდგომარეობა, ეს მთელ მსოფლიოშია, განსაკუთრებით ამერიკაში", — განაცხადა ცერცვაძემ.

ცერცვაძე ამბობს, რომ შეცდომას უშვებენ და მოუწოდებს, დაიცვან რეგულაციები.

კორონავირუსის შემთხვევების ზრდის გამო მთავრობის გადაწყვეტილებით, შვიდ დიდი ქალაქში საღამოს ათი საათის შემდეგ დილის ხუთ საათამდე გადაადგილება იზღუდება.

აღნიშნული შეზღუდვაში ზოგიერთი პოლიტიკოსი და სამოქალაქო აქტივისტი პოლიტიკურ სარჩულს ხედავს. სწორედ ამ მიზეზით მოძრაობა სირცხვილიამ 9 ნოემბერს პარლამენტის წინ "დაუმორჩილებლობის" აქცია გამართა. ისინი საღამოს ათ საათზე რუსთაველის გამზირზე შეიკრიბნენ და ღამე იქ გაათენეს. აქციის ტერიტორიის დატოვების შემთხვევაში კი პოლიცია მოქალაქეებს აჯარიმებდა.