სასამართლომ მიხაილო თოდუას ციხეში დაბრუნების მოთხოვა არ დააკმაყოფილა, თუმცა მას შინაპატიმრობის ვადა ორი საათით გაეზარდა.

მუსიკოსი ამბობს, რომ ვერ გაიგო, რატომ ისჯება და სასამართლოს ეს გადაწყვეტილება აუცილებლად გასაჩივრდება.

"თვითონ პრობაციამ წარადგინა მეორე მოთხოვნა. ერთი ის, რომ ითხოვენ ჩემს შებრუნებას და მეორე, რომ შემიმცირონ თავისუფლების პერიოდი. სასამართლომ, ამ ორიდან რომელიმე აირჩიეთო, ჩვენ არც ერთი არ ავირჩიეთ, რა თქმა უნდა, და სასამართლომ გადაწყვიტა, ცოტათი დამსაჯოს და კიდევ ორი საათი მომაკლო იმ 12 საათიდან. არც განხილულა წესიერად, ისევე ბუნდოვნად დარჩა, როგორც იყო. ვაპირებთ, გავასაჩივოთ და იმედია, მერე მაინც ვიპოვი სამართალს, თუ არა და გავა ეს წელიწადი და ათი თვე და დამანებებენ თავს", — განაცხადა მიხაილო თოდუამ.

ადვოკატის განმარტებით, პრობაციის სააგენტო თავდაპირველად ითხოვდა თავისუფლების აღკვეთას, თუმცა შემდეგ გადაადგილების დროის შეზღუდვა მოითხოვა, რაც სასამართლომ დააკმაყოფილა. შესაბამისად, მიხაილო თოდუას საღამოს 19:00 საათიდან სახლიდან გასვლა აკრძალული აქვს.

"ასეთი წარდგინებები არ ხდება ხოლმე. მოლოდინი არსებობს იმის, რომ პრობაციის ბიურო ჩამოყალიბებული იყოს მინიმუმ იმ აზრში, როგორც უნდა, რომ მოხდეს, მინიმუმ, პოზიცია უნდა ჰქონდეს მყარი. ჩვენ ვამბობდით, რომ არ უნდა დაკმაყოფილდეს არც ერთი ალტერნატივა, რადგან მისი ქმედება იყო კანონიერი. 28 შემთხვევა იყო სულ, 26-ჯერ მიმართა პრობაციის სააგენტოს, იღებდა ნებართვას სახლიდან გასვლაზე და მუშაობაზე. 27-ე და 28-ე იყო იდენტური, როგორც დანარჩენი 26, თუმცა რატომ მოხდა ისე, რომ გირჩის წინასაარჩევნო კამპანიაში მონაწილეობა მიიჩნიეს არასაპატიოდ და დანარჩენი საპატიოდ, გაუგებარია", — განაცხადა ადვოკატმა, გიორგი მახარაძემ სასამართლო პროცესის შემდეგ.

მისივე თქმით, რადგან მუსიკოსი უკვე ნებართვის აღების შემდეგ იგებს, რომ მისი ქმედება არასაპატიოა, პრობაციის სააგენტომ ნებისმიერ დროს შეიძლება იგივე გააკეთოს და კვლავ სასამართლოში მოუწიოთ სიარული.

გუშინ, 10 ნოემბერს, ცნობილი გახდა, რომ პრობაციის სამსახურმა მუსიკოს მიხაილო თოდუას ციხეში დაბრუნებას მოითხოვა. მუსიკოსის თქმით, მას საპატიოდ 13-14 და 17 ოქტომბრის ღონისძიებები არ ჩაუთვალეს — 17 ოქტომბერს მან გირჩის პარტიულ ღონისძიებაზე, ღამის ათი საათის შემდეგ დაუკრა.

მუსიკოსი მიხეილ თოდუა (მიხაილო) 2013 წლის სექტემბერში 12 გრამი MDMA-სთვის დააკავეს და 9-წლიანი პატიმრობა მიუსაჯეს. მას საპროცესო შეთანხმება შესთავაზეს, თუმცა, 20 ათასი ლარის არქონის გამო სასჯელს საპატიმროში იხდიდა. საბოლოოდ, თოდუამ საპატიმრო დაწესებულება 2019 წელს დატოვა, ხოლო დარჩენილი ვადა შინაპატიმრობით შეეცვალა.

შინაპატიმრობის პირობებში ის ვალდებულია, ატაროს ელექტროსამაჯური და საღამოს 9 საათის შემდეგ სახლიდან არ გავიდეს. ღონისძიებებზე დაკვრის შემთხვევაში კი პრობაციის სამსახურს უნდა მიმართოს.

გაიგე მეტი: