ერთიანი ნაციონალური მოძრაობის მიერ დაგეგმილი წინასაარჩევნო დასკვნითი ღონისძიების გამო თბილისის გარკვეულ უბნებში ტრანსპორტის მოძრაობა შეზღუდულია. ინფორმაცია ამის შესახებ შინაგან საქმეთა სამინისტრომ გაავრცელა.

სატრანსპორტო მოძრაობა სრულიად აკრძალულია თავისუფლების მოედანზე და ავტომობილები ალტერნატიული მარშრუტებით მოძრაობენ:

  • ბარათაშვილის ხიდიდან მომავალი ტრანსპორტი იუსტიციის სახლის მიმართულებით მოძრაობს;
  • დიდი ზომის ტრანსპორტისთვის გადაადგილება აიკრძალა ვახტანგ გორგასლის მოედანზე;
  • მსუბუქი ავტომანქანები კი მოძრაობენ კოტე აფხაზის ქუჩაზე და ვერცხლის ქუჩის გავლით ბარათაშვილის ქუჩაზე გადიან;
  • ლადო ასათიანის ქუჩიდან მომავალი ტრანსპორტი შალვა დადიანის ქუჩაზე ვერ მოხვდება, შესაბამისად, ავტომანქანები მოძრაობენ ოვანეს თუმანიანის ქუჩის გავლით, ვახტანგ გორგასლის მოედნის მიმართულებით;
  • მერაბ კოსტავას ქუჩაზე მოძრავი ავტომანქანები ბრუნდებიან ყოფილი ფოსტის შენობასთან და გადაადგილებას აგრძელებენ ელბაქიძის ქუჩის მიმართულებით.

დღესვე, აქციასთან დაკავშირებით, 17:00 საათიდან მოძრაობა იკრძალება:

  • რესპუბლიკის მოედანზე, შესაბამისად, პეტრე მელიქიშვილის ქუჩიდან მოძრაობა შესაძლებელი იქნება მერაბ კოსტავას ქუჩისა და ელბაქიძის დაღმართის გავლით,
    მტკვრის ორივე სანაპიროსა და ჩუღურეთის მიმართულებით;
  • რუსთაველის გამზირსა და მასზე გამომავალ ყველა ქუჩაზე: ალექსანდრე ჭავჭავაძის, მიტროფანე ლაღიძის, ბესიკის, 9 აპრილის, ზაქარია ჭიჭინაძის, ლესია უკრაინკას, მესხიას, რევაზ ლაღიძის, ვასო აბაშიძის, გია ჭანტურიას, არჩილ ჯორჯაძის და ანტონ ფურცელაძის ქუჩებზე;

აღნიშნული აკრძალვის პერიოდში ავტომანქანებს გადაადგილება შეეძლებათ ორივე სანაპიროზე, ვასილ პეტრიაშვილის, თამარ ჭოველიძის და დანიელ ჭონქაძის ქუჩებზე.

საჭიროების შემთხვევაში, მძღოლები პატრულ-ინსპექტორებისგან დამატებით ინსტრუქციას მიიღებენ.