ევროპულმა საქართველო, ერთიანი ნაციონალური მოძრაობა, გირჩი, სტრატეგია აღმაშენებელი და ერთიანი საქართველო მართლმსაჯულების სისტემის საერთო რეფორმაზე შეთანხმდნენ და დღეს შინაგან საქმეთა სამინისტროსთან შესაბამის დოკუმენტს ხელი მოაწერეს.

ეს შეთანხმება ბორჯომში NDI-ს ორგანიზებით გამართული მოლაპარაკებებისას შეჯერებული საკითხების ნაწილის რატიფიცირებაა. შეთანხმება გულისხმობს 2020 წლის საპარლამენტო არჩევნებში ქართული ოცნების დამარცხების შემდეგ, მართლმსაჯულების სისტემის რეალური დამოუკიდებლობისა და მისდამი ნდომის გაზრდის მიზნით სხვადასხვა რეფორმის განხორციელებას.

შეთანხმების ძირითადი მიმართულებები:

შინაგან საქმეთა სამინისტრო

  • პოლიციის დეცენტრალიზაცია და შსს მინისტრისთვის საპოლიციო ფუნქციების ჩამოცილება;
  • თვითმართველობის ფარგლებში არჩევითი შერიფების ინსტიტუტის შემოღება, სადაც შერიფი იქნება პასუხისმგებელი ყველა ტიპის დანაშაულთან ბრძოლაზე, გარდა ისეთი დანაშაულებისა, რომელთა მასშტაბიც ცდება მისი ტერიტორიული კომპეტენციის ფარგლებს;
  • ორგანიზებულ დანაშაულთან ბრძოლის ბიუროს შექმნა.

პროკურატურა

  • ნაკლებად მძიმე დანაშაულზე დაზარალებულისთვის უფლების მიცემა, აირჩიოს, მისი ინტერესების სასამართლოში დამცველი. დაზარალებულის ინტერესის დამცველი კი შეიძლება იყოს სახელმწიფო პროკურორი ან ადვოკატი, რომელიც ასეთ შემთხვევაში შეასრულებს ბრალმდებლის ფუნქციას;
  • პროკურატურისთვის გამოძიებაზე ზედამხედველობის ფუნქციის ჩამოცილება და მხოლოდ სასამართლოში წარმომადგენლობის უფლებამოსილების დატოვება;
  • ანტიკორუფციული პროკურატურის შექმნა.

სუს-ი

  • სუს-ის დაშლა და მისი პოლიტიკური პოლიციის ფუნქციის გაუქმება;
  • დამოუკიდებელი ანტიკორუფციული ბიუროს შექმნა.

"ეს რეფორმა, რომელიც აქ არის ახლა ასახული ფურცელზე, სრულად ჯდება იმ პოლიტიკურ პლატფორმაში, რომელიც გვაქვს ჩვენ, ენმ-ს, მართლმსაჯულების რეფორმასთან დაკავშირებით. მნიშვნელოვანია, რომ პოლიციური სისტემა, როგორც სუს-ი, ესაა რეპრესიული სისტემა, რომელიც აღარ უნდა არსებობდეს, ის რომ პოლიციელი უნდა იყოს ღირსეული მსახური და არა პოლიტიკური დაკვეთების შემსრულებელი, ის, რომ ადამიანებს უნდა ჰქონდეთ უფლება საკუთარ უსაფრთხოებაზე პასუხისმგებელი ადამიანების, შერიფების, არჩევის უფლება", — განაცხადა ერთიანი ნაციონალური მოძრაობის წევრმა, ხატია დეკანოიძემ.

ბორჯომში შეხვედრაზე ოპოზიციურმა პარტიებმა სხვა საკითხებზეც იმსჯელეს და განაცხადეს, რომ შესაბამის დოკუმენტს ხელს მაშინ მოაწერენ, როცა ყველა ოპოზიციური პარტია შეჯერდება და საერთო მზაობა იქნება.