ირაკლი ოქრუაშვილის პარტიის, გამარჯვებული საქართველოს წევრის, გურამ ჩალაგაშვილის სასამართლო სხდომა არასაკმარისი მტკიცებულებების გამო გადაიდო. სხდომის გადადების შუამდგომლობა საპატრულო პოლიციამ ითხოვა. ჩალაგაშვილი დღეს, პირველ ოქტომბერს გამთენიისას წვრილმანი ხულიგნობის ბრალდებით დააკავეს.

ბრალდების მხარის განცხადებით, გურამ ჩალაგაშვილმა პატრულის თანამშრომლებს "გაიშნიკები უწოდა", სიტყვიერი შეურაცხყოფა მიაყენა საქართველოს მთავრობასა და პრემიერ-მინისტრს. მათი თქმით, ჩალაგაშვილი ამით არღვევდა საზოგადოებრივ წესრიგსა და სიმშვიდეს.

ოპოზიციური პარტიის ლიდერის თქმით, ბრალდება ფარსია და ამით მისი შეშინება სურდათ. ის ამტკიცებს, რომ ბოლო სამი დღის განმავლობაში სახელმწიფო უსაფრთხოების მანქანა დაყვებოდა:

"ბიძინა ივანიშვილი იყო ჩემი სამიზნე, მას ვლანძღავდი და გავლანძღავ ახლაც, მივაყოლებ გახარიას... მანქანით მივდიოდით, უკან ვიჯექი და მოპირდაპირე მხრიდან მომავალმა პატრულმა უცებ მოატრიალა მანქანა. ორივე პატრული გადმოვიდა, ერთი მოვიდა ჩემთან. რომ ვუთხარი ხართ ჩვეულებრივი გაიშნიკები მეთქი, ამ დროს გამოიძახეს ოცმეთაური. იმან ფანჯრიდან გამოყო თავი და თქვა დაიჭირეთო".

ჩალაგაშვილი აცხადებს, რომ ირაკლი ოქრუაშვილის შემდეგ "ახლა მას მიადგნენ". ოქრუაშვილი 25 ივლისს დააკავეს. მის დაპატიმრებას ოპოზიცია რუსთავი 2-ის საქმეს უკავშირებს. ოქრუაშვილი ამბოდა, რომ არხის 100-პროცენტიანი წილი მას ეკუთვნის. შსს-მ ოქრუაშვილი 4 პირთან ერთად 20 ივნისის აქციის საქმეზე დააკავა. დაკავებულებს ბრალად ჯგუფური ძალადობა ედებათ.