"ყველაფრის კადრება სირცხვილია. პატრიოტთა ალიანსისა და ასავალ დასავლის ტყლაპოში თევზაობა სირცხვილია. ფარისევლობა სირცხვილია. სირცხვილია!" — ასე გამოეხმაურა ევროპული საქართველოს წევრი გიორგი გაბაშვილი ექსპრეზიდენტ მიხეილ სააკაშვილის განცხადებებს, რომლითაც მან გიგა ბოკერია "ანტიქრისტიანულ და ანტიქართულ" ქცევებში დაადანაშაულა.

სააკაშვილის განცხადებები უკვე კრიტიკის ობიექტი გახდა. სამოქალაქო საზოგადოება ექსპრეზიდენტს პოპულიზმში ადანაშაულებს. ევროპული საქართველოს ერთ-ერთმა ლიდერმა, სერგო რატიანმა ის შავრაზმელებს შეადარა, გიგი უგულავამ კი დაწერა, რომ სირცხვილია და ამ ფაქტს ვერ შეაფასებს. ნაციონალური მოძრაობის ლიდერმა, ნიკა მელიამ კი ფეისბუქმეგობრებს ჰკითხა რჩევა.

დღეს, 30 სექტემბერს მთავარი არხის ეთერში მიხეილ სააკაშვილმა ევროპული საქართველოს ლიდერს, გიგა ბოკერიას ბრალს დასდო "ტრადიციული, ქართული, ქრისტიანული ფასაულობებისგან დისტანცირებაში".

სააკაშვილს მთავარი აქცენტების წამყვანებმა ევროპულ საქართველოსთან განსხვავებაზე დაუსვეს კითხვა, რის პასუხადაც მან იმის მტკიცება დაიწყო, რომ შეიძლება ბევრს არ სჯერა, მაგრამ ქრისტიანია და ჯვარსაც ატარებს. ამის შემდეგ სააკაშვილი ბოკერიას კრიტიკადაიწყო.

"მთელი ეს წლები განსაკუთრებულად ცინიკური დამოკიდებულება ქართული ტრადიციებისა და ფასეულობების მიმართ. ჩვენი ფასეულობები, რომელიც ჩვენთვის არის უძვირფასესი... ბოკერია არის ყველაფერი, პრინციპში, რაც არის ქართული ტრადიციების წინააღმდეგ", — განაცხადა სააკაშვილმა.

გადაცემის ერთ-ერთმა წამყვანმა, ნიკა გვარამიამ მას უთხრა, რომ ეს პოპულისტურ განცხადებად ჟღერდა, თანაწამყვანმა ეკა კვესიტაძემ კი განუმარტა, რომ იგივე რიტორიკით და უარგუმენტოდ საუბრობდნენ ქართული მარში და სხვა ანტიდასავლური ორგანიზაციები ბოკერიაზე და თავად სააკაშვილზეც. პასუხად სააკაშვილმა განაცხადა, რომ ის ბოკერიას არ ჰგავს, რადგან ბევრი ეკლესია აქვს აშენებული.

,