"მართალია, შრომისუუნარო გამხადეთ, მაგრამ მე მაინც ბედნიერი ვარ, რომ ბრძოლისუნარიანობა არ დამიკარგავს. იმ სამარცხვინო ლაქას, რომლის ჩამორეცხვასაც ასე ძალიან აჩქარებდა მოსამართლეს, ვერასდროს ვერ ჩამოირეცხავს, რადგან ღირსებისთვის რომ იბრძოლო, ღირსება უნდა გაგაჩნდეს", — ასე გამოეხმაურა ეკა მესხიძე, რომელიც საჯარო რეესტრის ყოფილ ხელმძღვანელს, პაპუნა უგრეხელიძეს სექსუალურ შევიწროებაში ადანაშაულებს, სასამართლოს გადაწყვეტილებას, რომლითაც ნაწილობრივ დაკმაყოფილდა უგრეხელიძის სარჩელი ღირსების შელახვაზე.

მესხიძე წერს, რომ "ივანიშვილი-წულუკიანი-მინდია უგრეხელიძის" სასამართლოსგან სხვა არაფერს ელოდა და ისიც უკვირს, რომ არ დაიჭირეს. მისი თქმით, "მურუსიძე-ჩინჩალაძის კლანს" კიდევ ერთი მოსამართლე ზაალ მარუაშვილი მიემატა ამ აბსურდული გადაწყვეტილების გამო. ის მოსამართლესა და უგრეხელიძის ადვოკატებ მიმართავს:

"ბატონო მოსამართლე, თქვენს შვილს, სულ ახლახანს რომ მოევლინა ამ ქვეყანას, თქვენს პატარა სიხარულ გოგოს რომ მსგავსი ნაძირალა დაჩაგრავს და შეავიწროვებს რომ გაიზრდება (და თქვენიც ადვოკატებო), იმედი მაქვს ცოცხალი ვიქნები და ეჭვი არ შეგეპაროთ, რომ დავიცავ. ის რაც ერთი წლის განმავლობაში სისაძაგლე მოისმინეთ და მტკიცებულებების სახით იხილეთ, მსგავსი გადაწყვეტილება რომ მიიღეთ, უკვე გასაგებია რა დღეში ხართ და ნამდვილად მეცოდებით".

მესხიძე ამბობს, რომ ბრძოლას აგრძელებს და გაასაჯაროებს ყველა მტკიცებულებას, სახახლო დამცველის დაკსვნასთან ერთად, რაც მოსამართლემ არ გაითვალისწინა.

დღეს თბილისის საქალაქო სასამართლოს გადაწყვეტილებით, მესხიძეს დაევალა მედიებში უარყოს ბრალდებები უგრეხელიძის მიმართ. მესხიძის ადვოკატის განცხადებით, სასამართლო გადაწყვეტილება სრულიად დაუსაბუთებელია და მას სააპელაციო სასამართლოში გაასაჩივრებენ. მისივე თქმით, ქალს ცნობების უარყოფა მანამ არ ევალება, სანამ გასაჩივრების ვადა აქვთ.

უგრეხელიძის საქმეზე სახალხო დამცველს სექსუალური შევიწროება აქვს დადგენილი. ადვოკატის თქმით, ეს დასკვნა არ საჩივრდება და სასამართლოს არ უთქვამს, რომ ქალის მიმართ სექსუალური შევიწროება არ განხორციელებულა, რადგან მხოლოდ უგრეხელიძის სარჩელს განიხილავდა.

მესხიძე ამბობდა, რომ საჯარო რეესტრში მუშაობის პერიოდში, ყოველდღიურად უწევდა უგრეხელიძისაგან დამცირებისა და შეურაცხყოფის ატანა. მისი თქმით, სიტუაციის გამწვავება არ სურდა და ამიტომ ითმენდა. მისივე თქმით, დუმილის დარღვევა მას შემდეგ გადაწყვიტა, რაც საჯარო რეესტრში დაკავებული თანამდებობდა დატოვა და ახალ სამსახურში პაპუნა უგრეხელიძის მხრიდან მუქარისა და ღირსების შემლახავი განცხადებები გაგრძელდა. უგრეხელიძემ სააგენტოს თავმჯდომარის პოსტი 2018 წლის 27 მარტს დატოვა, სასამართლოში კი 14 ივნისს იჩივლა.