თბილისის მერია აპირებს, რომ საქართველოს მართლმადიდებელი ეკლესიის საპატრიარქოს 3 645 მ2 მიწა გადასცეს. აღნიშნული მიწა წყნეთის გზატკეცილზე, ავტოინსპექციის საგუშაგოსთან მდებარეობს. შესაბამისი საკითხი უკვე შეტანილია თბილისის საკრებულოს დღევანდელი სხდომის დღის წესრიგში. დღესვე, აღნიშნულ საკითხზე საკრებულოს იურიდიულ საკითხთა კომისიაში მოხსენება წარადგინა დედაქალაქის მერიის ქონების მართვის სააგენტოს უფროსმა კარლო ლაფერაძემ.

ლაფერაძის თქმით, ტერიტორია მშენებარე ეკლესიისთვისაა საჭირო:

"ეკლესიის მშენებლობა უკვე დაწყებულია და მიდის იმ ტერიტორიაზე, რომელიც წლების წინ ეკონომიკის სამინისტრომ გადასცა და ეს არის უბრალოდ დამატებითი ნაწილი, რომელსაც ერთიან სივრცეში, ერთიან გამწვანებაში ჩასვამენ".

კარლო ლაფერაძემ არ უპასუხა On.ge-ს ჟურნალისტის შეკითხვებს ამ საკითხთან დაკავშირებით.