იუსტიციის მინისტრის, თეა წულუკიანის მოადგილე, გოჩა ლორთქიფანიძე ჰააგის სისხლის სამართლის საერთაშორისო სასამართლოს დაზარალებულთა ფონდის დირექტორატში აირჩიეს. სამინისტროს ინფორმაციით, ლორთქიფანიძე არის პირველი ქართველი, ვინც ამ ფონდში აღმოსავლეთ ევროპის ქვეყნებისათვის განკუთვნილი კვოტით აირჩიეს.

მის არჩევას მხარი 123 სახელმწიფოს წარმომადგენლმა დაუჭირა. მოცემულ პიზიციაზე არჩეული პირის მანდატი ორწლიანია, ხოლო დირექტორატი 5 წევრისაგან შედგება.

იუსტიციის სამინისტროში ამბობენ, რომ ამ დაზარალებულთა ფონდში ლორთქიფანიძის არჩევა შესაძლებლობას აძლევს საქართველოს, ფონდის ყურადღება მიმართოს საქართველოსათვის მნიშვნელოვან საკითხზე − დაზარალებულთა საჭიროებებსა და მათთვის მიყენებული ზიანზე. უწყებაში ამბობენ იმასაც, რომ ვინაიდან ჰააგის სასამართლოს პროკურატურა 2008 წლის აგვისტოს ომის დროს ქართველების წინააღმდეგ ჩადენილ დანაშაულებს იძიებს, მსხვერპლთა დაცვა და მათი უფლებების აღდგენა ქვეყნისთვის მნიშვნელოვანი პრიორიტეტია.

სისხლის სამართლის საერთაშორისო სასამართლოს წევრი სახელმწიფოების ასამბლეის (ASP) სესიის ფარგლებში 2018 წლის 5 დეკემბერს ჰააგაში დაზარალებულთა ფონდის დირექტორატის არჩევნები გაიმართა. ასამბლეა ჰააგის სასამართლოს წევრი სახელმწიფოების უმაღლესი დონის შეხვედრაა, სადაც მონაწილე 123 სახელმწიფოს დელეგაცია მთავარ სტრატეგიულ საკითხებს განიხილავს.

წლევანდელ რიგით მე-17 სესიაზე საქართველოს იუსტიციის მინისტრის მოადგილის სიტყვით გამოსვლაცაა დაგეგმილი. გოჩა ლორთქიფანიძის მოხსენების ძირითადი თემა 2008 წლის ომის დროს ჩადენილი დანაშაულების — ქართველთა ეთნიკური წმენდის, ქართველი სამხედროებისა და მშვიდობიანი მოსახლეობის წინააღმდეგ ჩადენილი ომის დანაშაულების დროულად გამოძიების აუცილებლობა იქნება.

გოჩა ლორთქიფანიძის კარიერა ჰააგაში

იუსტიციის სამინისტროს ინფომაციით, გოჩა ლორთქიფანიძე 1998 წელს რომის კონფერენციაზე საქართველოს დელეგაციის მანდატის ძირითადი ავტორია. იყო ჰააგის სასამართლოს დამფუძნებელი ტექსტის — რომის სტატუტის პროექტის გარშემო მოლაპარაკებების პროცესში "თანამოაზრე სახელმწიფოთა ჯგუფში" საქართველოს გაწევრიანების ინიციატორი.

მათივე თქმით, 1999-2002 წლებში, ლორთქიფანიძე საქართველოს წარმოადგენდა ჰააგის სასამართლოს დამფუძნებელ კომისიაში, რომელმაც შეიმუშავა სასამართლოს რეგლამენტი და მტკიცებულების ადმინისტრირების წესი, დანაშაულების ელემენტების დოკუმენტი, შეთანხმება სასამართლოსა და გაერთიანებულ ერებს შორის ურთიერთობების შესახებ, შეთანხმება სასამართლოს პრივილეგიებისა და იმუნიტეტების შესახებ.