თბილისის მერიის ეკოლოგიისა და გამწვანების სამსახურის უფროსის, ნინო სულხანიშვილის განმარტებით, 17 აგვისტოს, თბილისში, ყაზბეგის გამზირზე არა მხოლოდ დაზიანებული, არამედ საღი ხეებიც მოიჭრა. ინფორმაციას იმედი ავრცელებს.

სულხანიშვილის თქმით, მიუხედავად იმისა, რომ მოჭრის ნებართვა მხოლოდ ხმელ, ავარიულსა და ამორტიზებულ ხეებზე იყო გაცემული, საღი ხეები მაინც მოჭრეს:

"რატომ მოხდა ეს. ეს იყო ის ხეები, რომლებზეც არ იყო ნებართვა გაცემული და არის ამ 68 ხის ჩამონათვალში ეს ხეები, როგორც საღი".

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს.

სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.