ვაკის პარკში 29 სექტემბერს ილიას სახელმწიფო უნივერსიტეტის ორგანიზებით საქართველოში მე-7 სამეცნიერო პიკნიკი ჩატარდა.

ღონისძიების მიზანი მეცნიერების პოპულარიზაცია და თანამედროვე ტექნოლოგიური მიღწევების ნებისმიერი ასაკის დამთვალიერებლისთვის სახალისო და საინტერესო ფორმით წარმოჩენაა.

სამეცნიერო პიკნიკში მონაწილეობა გერმანიის, ამერიკის შეერთებული შტატების, პოლონეთის, უნგრეთის და ევროპის სხვა ქვეყნების წარმომადგენლებმაც მიიღეს. ღონისძიება კი ამერიკის შეერთებული შტატების საელჩოს პრესმდივანმა გახსნა.

წლევანდელი სამეცნიერო პიკნიკის თემა გაერთიანებული ერების მდგრადი განვითარების 17 მიზანია.

ილიას სახელმწიფო უნივერსიტეტის რექტორის მოადგილე ნინო დობორჯგინიძის თქმით, წლევანდელ ღონისძიებაში მათ სცადეს ხაზი არა მხოლოდ მეცნიერების საინტერესო და სახალიზო მხარეზე გაესვათ, არამედ იმაზეც, თუ რამდენად დიდი პასუხისმგებლობა გვაკისრია ადამიანებს მეცნიერების სახით სამყაროს მიმართ.

"მეცნიერება სამყაროს წინაშე ადამიანის პასუხისმგებლობაა, დღევანდელი ღონისძიებით ჩვენ ვცადეთ, რომ როგორმე ეს პასუხისმგებლობა ახალგაზრდებამდე მიგვეტანა. ექსპერიმენტები იდეურად გაეროს განვითარების გეგმის 17 მიზანს მოვარგეთ, რათა ვაჩვენოთ ის გზები რისი საშუალებითაც ამ მიზნების მიღწევა შეიძლება," - აცხადებს ნინო დობორჯგინიძე.

ვაკის პარკში ასევე მოეწყო სამეცნიერო კაფე, სადაც პროფესორებმა სხვადასხვა თემებზე ლექციები წაიკითხეს.

ვაკის პარკში ჯამში 40-მდე სამეცნიერო კარავი მოეწყო, რომელშიც სხვადასხვა უნივერსიტეტის წარმომადგენლები მონაწილეობდნენ.

"ჩვენს კარავში წარმოდგენილია სხვადასხვა ტიპის რობოტები, მარტივი კონსტრუქციები, არდუინოს კონტროლერები და სხვადასხვა ტიპის სენსორები, რომლის საშუალებითაც დამთვალიერებლებთან ერთად სხვადასხვა ექსპერიმენტებს ვატარებთ და თან ვუხსნით, თუ როგორ მუშაობს ეს ყველაფერი." - ამბობს ნანა დიხამინჯია, ილიას სახელმწიფო უნივერსიტეტის კომპიუტერული და ელექტრონული ინჟინერიის პროფესორი.

სამეცნიერო პიკნიკის დასრულების შემდეგ, ტრადიციულად, ღონისძიების მთავარ სცენაზე ერთიან ეროვნულ გამოცდებზე წარმატებული პირველკურსელები დააჯილდოვეს.