არგენტინაში პოლიციის რვა ოფიცერი სამსახურიდან გაათავისუფლეს, მას შემდეგ რაც მათ პოლიციის საწყობიდან ნახევარი ტონა მარიხუანის დაკარგვა თაგვებს დააბრალეს.

მარიხუანა საწყობში ორი წელი ინახებოდა, თუმცა შემოწმებისას აღმოჩნდა, რომ დარეგისტრირებული 6 000 კილოგრამიდან, მხოლოდ 5 460 კილოგრამი იყო დარჩენილი.

საქმე სასამართლომდე მივიდა. პოლიციის თანამშრომლები ირწმუნებოდნენ, რომ მარიხუანის დაკარგვა თაგვებთან იყო დაკავშირებული, თუმცა მოწვეულმა ექსპერტებმა აღნიშნეს, რომ ამ რაოდენობის მარიხუანის წაღებას პატარა ცხოველები მხოლოდ იმ შემთხვევაში შეძლებდნენ, თუ საწყობს თაგვების მთელი ლაშქარი შეესეოდა.

ბუენოს-აირესის უნივერსიტეტიდან მოწვეული ექსპერტები ასევე აცხადებენ, რომ თაგვებს მარიხუანა საკვებში არ აერეოდათ და თუნდაც ეს მომხდარიყო, საწყობი თაგვების გვამებით აივსებოდა.

დაკარგული მარიხუანის საქმეზე გამოძიება ამ დრომდე გრძელდება.