ქალი, რომელიც საჯარო რეესტრის ყოფილ ხელმძღვანელს სექსუალურ შევიწროებაში ადანაშაულებს აცხადებს, რომ ბრძოლამ შედეგი გამოიღო, რადგან პაპუნა უგრეხელიძემ თანამდებობა დატოვა. ამის შესახებ მან რუსთავი 2-თან ინტერვიუში ისაუბრა.

მისი თქმით, საჯარო რეესტრის თანამშრომლები მადლობას უხდიან მას იმის გამო, რომ შეძლო მათი გათავისუფლება უგრეხელიძისგან:

"ეს იყო პასუხი ყველა იმ ტკივილისთვის, ყველა იმ ცრემლისთვის, დამცირებისთვის და შეურაცხყოფისთვისაც. დღეს ძალიან აღელვებული ვარ და არ შემიძლია არ ვთქვა, ათეულობით ადამიანი რეესტრიდან მწერენ მირეკავენ და მადლობას მიხდიან იმისთვის, რომ მე შევძელი და ვიხსენი ისინი ამ კოშმარული გარემოდან."

მესხიძის განცხადებით, უგრეხელიძის მხრიდან წამოსული ბრალდებები იმის შესახებ, რომ ეს პოლიტიკური შურისძიებაა სიმართლეს არ შეესაბამება:

"რაც შეეხება ბრალდებებს, მინდა გითხრათ, რომ ყველაფერს ველოდი ამ ადამიანისგან, მაგრამ არა ასეთ აბსურდულ ბრალდებებს. ყველაზე დიდი შეცდომა იყო ის, რომ მან ეს პოლიტიკურ ჭრილში გადაიტანა, რომელსაც არანაირი კავშირი არ აქვს იმ ბრალდებებთან და პრობლემებთან, რომლებზეც მე ვსაუბრობ. დამნაშავე, ვინც არის, უკვე ცნობილია."

ბოლო ათი დღის განმავლობაში საქართველოში ქალები სექსუალური შევიწროებაზე ალაპარაკდნენ და საჯარო პირებს ადანაშაულებენ. არასამთავრობო ორგანიზაცია სიდას ხელმძღვანელის, ზვიად დევდარიანის შემდეგ სექსუალურ შევიწროებაში საჯარო რეესტრის ხელმძღვანელი, პაპუნა უგრეხელიძე დაადანაშაულეს.

დღეს, 27 მარტს პაპუნა უგრეხელიძემ ფეისბუქზე თანამდებობის დატოვების შესახებ განცხადება გაავრცელა. იუსტიციის მინისტრმა, თეა წულუკიანმა მოთხოვნა დააკმაყოფილა.