დონალდ და მელანია ტრამპებმა, ნიუ-იორკში მდებარე გუგენჰაიმის მუზეუმს ვან გოგის ნახატი სთხოვეს, რომელიც თეთრი სახლის საცხოვრებელ ნაწილში უნდა გამოეკიდათ.

ამერიკის პირველმა ოჯახმა მუზეუმისგან ვან გოგის პეიზაჟი თოვლით ითხოვა, რომელზეც კაცი და მისი ძაღლი ჩანან.

ფოტო: Vincent van Gogh

ამერიკის პრეზიდენტმა და პირველმა ლედიმ უარი მიიღეს, თუმცა მუზეუმმა მათ სანაცვლოდ იტალიელი არტისტის მიერ გაკეთებული ოქროს უნიტაზის შესთავაზა.

გუგენჰაიმის მუზეუმის კურატორი, ნენსი სპეკტორი, სოციალურ მედიებში ტრამპის მიმართ ღიად კრიტიკულია. მან თეთრ სახლს მიწერა, რომ ტრამპს, სექტემბრის შუა რიცხვებამდე, მუზეუმის საპირფარეშოში მდებარე ოქროს უნიტაზის წაღება შეეძლო, რომელსაც დამთვალიერებლები იყენებნენ.

მაურიზიო კატელანის უნიტაზს ამერიკა ჰქვია და მისი ღირებულება 1 მილიონი დოლარია.

"სამწუხაროდ თქვენი პირვანდელი თხოვნის დაკმაყოფილება არ შეგვიძლია, თუმცა, ვიმედოვნებთ, რომ ეს განსაკუთრებული შემოთავაზება დაგაინტერესებთ" - წერია ნენსის წერილში.

თეთრ სახლს, შეთავაზებაზე არ უპასუხია.