ჰოლივუდში ქალი მსახიობები, მათი კოლეგა კაცებისგან განსხვავებით, რომ ნაკლებ ჰონორარს იღებენ, ეს ახალი ამბავი ნამდვილად არ არის.

ამ თემაზე ხშირად საუბრობენ ქალები და თანაბარი ანაზღაურებას მოითხოვენ. ერთ-ერთი პირველი, ვინც ამ თემაზე საჯაროდ გააკეთა კომენტარი, ჯესიკა ჩესტეინი იყო. როგორც აღმოჩნდა, ის საუბრის გარდა კოლეგა მსახიობ ქალებს იმაშიც ეხმარება, რომ მათ საკუთარი უფლებები დაიცვან და შესაბამისი ანაზღაურება მოითხოვონ.

ჰოლივუდის უცხოური პრესის ასოციაციის მიერ გამართულ ღონისძიებას - "ქალები არღვევენ ბარიერს", ოქტავია სპენსერიც ესწრებოდა, რომელმაც სწორედ აქ მოყვა ისტორია იმის შესახებ, თუ როგორ დაეხმარა ჯესიკა ჩესტეინი მას მაღალი ჰონორარის მიღებაში.

"ერთი რიგითი საღამო იყო, ქალთა უფლებებზე ვსაუბრობდით და ვთქვი, რომ შავკანიან მსახიობ ქალებს დაბალ ანაზღაურებას გვაძლევენ, განსხვავებით თეთრკანიანი ქალი მსახიობებისგან. ჯესიკა მიყურებდა და მითხრა, ოქტავია, ჩვენ შენი ჰონორარის გაზრდა უნდა მოვითხოვოთ. ჩვენ ერთსა და იმავე რამეს ვაკეთებთ და დაუშვებელია, რომ მე იმაზე მაღალი ჰონორარი მქონდეს, ვიდრე შენ. სწორედ ამიტომ, ჩვენ მივედით და ჰონორარის გაზრდა მოვითხოვეთ. სწორედ ამიტომ მიყვარს ის [ჯესიკა], ნაბიჯ-ნაბიჯ მოგყვება ყველგან, სადაც ხედავს, რომ მისი დახმარება გჭირდება", - ყვება ოქტავია.

როგორც იცით, ოსკარის მფლობელი მსახიობი ოქტავია სპენსერი და ჯესიკა ჩესტეინი გადასაღებ მოედანზე კვლავ გაერთიანდებიან. მსახიობებმა პირველად ერთად 2011 წელს, The Help-ში მიიღეს მონაწილეობა.

ახალ კომედიას მსახიობების მონაწილეობით Universal გადაიღებს. სიუჟეტი ორი ქალის დაპირისპირებაზეა, რომლებიც ცდილობენ ოჯახს ყველაზე კარგი შობა მოუწყონ.