კატრინ დენევისა და ბრიჯიტ ბარდოს შემდეგ, ჰოლივუდში წამოწყებულ კამპანიებს #metoo-სა და Time's up-ს ფრანგი მსახიობი, ჟულიეტ ბინოშიც ეხმაურება.

"ძალიან მნიშვნელოვანია, რომ ფემინიზმზე ვისაუბროთ და პატივი ვცეთ, თუმცა, გაოცებული ვარ, რომ კაცები ამაზე ხმამაღლა თითქმის არ ლაპარაკობენ. დარწმუნებული ვარ, რომ ისინი ქალების მსგავსად, ხშირად არიან შევიწროებისა და ჩაგვრის მსხვერპლი. მიუხედავად ამისა, ისინი ამაზე არასდროს საუბრობენ. მიყვარს, როდესაც კაცები საკუთარ თავს გამოხატავენ, ეს მნიშვნელოვანია და ვფიქრობ ეს არის ის, რაც ჩვენ გვაკლია", - ამბობს ბინოში.

შეგახსენებთ, რომ ცოტა ხნის წინ, ფრანგმა მსახიობმა, კატრინ დენევმა სხვა ას ქალთან ერთად ჰოლივუდში დაწყებული კამპანია #MeToo და Time's up გააკრიტიკა და სექსუალური შევიწროების წინააღმდეგ დაწყებული კამპანია ტოტალიტარიზმს შეადარა.

მის განცხადებას მედიაში დიდი გამოხმაურება მოყვა და დენევს დამატებითი განცხადებების გაკეთება მოუწია. მსახიობმა სექსუალური შვიწროების მსხვერპლ ქალებს ბოდიში მოუხადა და თქვა, რომ მისი განცხადება არასწორად იყო აღქმული.

რამდენიმე დღის წინ კი 60-იანი წლების ვარსკვლავმა ბრიჯიტ ბარდომ, სექსუალური შევიწროების წინააღმდეგ წამოწყებულ კამპანიებს ყალბი და სასაცილო უწოდა.