გაბედული, სექსუალური და ნიჭიერი, ოქროს გლობუსისა და ოსკარის ნომინანტი მსახიობი შერონ სტოუნი CBS-სთან ინტერვიუში მის კარიერაზე, სექსუალურ შევიწროებასა და მეორე შანსზე საუბრობს.

"ახლა ყველაფერს თავიდან ვიწყებ", - ამბობს შერონ სტოუნი და 2001 წელს იხსენებს, როდესაც ინსულტი დაემართა და მისი გადარჩენის შანსები თითქმის არ არსებობდა.

"გადარჩენის შანსი თითქმის არ არსებობდა, ექიმები ამბობდნენ, რომ ალბათობა 5%-ზე დაბალი იყო. გადავრჩი, მაგრამ ინსულტმა დიდი გავლენა იქონია ჩემს რეფლექსებზე, მეტყველებაზე, სმენაზე, სიარულზე, კითხვასა და წერაზე. ყველაფრის თავიდან სწავლა მომიხდა", - ამბობს ინტერვიუში შერონ სტოუნი.

CBS-სთან საუბარში სტოუნი ყვება, რომ მას ამ თემაზე კოლეგებთან არაფერი უთქვამს და სრულიად მარტო დარჩა.

"გულგატეხილი ხალხი არავის უყვარს, მე ჩემს პრობლემაზე ხმამაღლა არასდროს მისაუბრია. ვიცი, რომ მთელი ეს წლები ვიღაცას შეიძლება უცნაური ვეჩვენებოდი, მაგრამ იმის მოყოლა რაც დამემართა, არ მინდოდა", - ამბობს შერონ სტოუნი.

ჟურნალისტმა მსახიობს ჰოლივუდში სექსუალური შევიწროების თემაზეც დაუსვა კითხვა და დაინტერესდა ოდესმე თუ ყოფილა ის სექსიზმის მსხვერპლი.

"40 წელია ამ ბიზნესში ვარ. შეგიძლიათ წარმოიდგინოთ ის დრო როდესაც კარიერაში ნაბიჯებს ვდგამდი? პენსილვანიიდან ჩამოვედი, თანაც არავინ მყავდა ვინც დამიცავდა. ვფიქრობ ამით ყველაფერი ნათქვამია", - ამბობს შერონი.

მიუხედავად იმისა, რომ მსახიობს კარიერის განმავლობაში თითქმის სულ ჰქონდა შეთავაზებები და ყოველ წელს რომელიმე პროექტში იყო დაკავებული, როგორც თავად ამბობს 2018 წელს მისთვის ყველაფერი თავიდან დაიწყება, რადგან წინ დიდი გეგმებია.