ცოტა ხნის წინ, ფრანგმა მსახიობმა, კატრინ დენევმა სხვა ას ქალთან ერთად ჰოლივუდში დაწყებული კამპანია #MeTooდა Time's up გააკრიტიკა და სექსუალური შევიწროების წინააღმდეგ დაწყებული კამპანია ტოტალიტარიზმს შეადარა.

მის განცხადებას მედიაში დიდი გამოხმაურება მოყვა და დენევს დამატებითი განცხადებების გაკეთება მოუწია. მსახიობმა სექსუალური შვიწროების მსხვერპლ ქალებს ბოდიში მოუხადა და თქვა, რომ მისი განცხადება არასწორად იყო აღქმული.

"მე თავისუფალი ქალი ვარ და სულ ასეთად დავრჩები. სრულ მხარდაჭერას ვუცხადებ ძალადობის მსხვერპლ ქალებს და ბოდიშს ვუხდი იმ წერილისთვის, რომელიც Le Monde-ში გამოქვეყნდა. ვწუხვარ, თუ ეს მათთვის ტკივილისმომგვრელი აღმოჩნდა", - ამბობს დენევი.

ბოდიშთან ერთად მსახიობმა ისიც თქვა, რომ აუცილებელია ყველა ასეთი საქმე საფუძვლიანად გამოიძიონ.

"აუცილებელია, რომ სამართლიანობა აღსრულდეს. შესაბამისმა ორგანოებმა ყველაფერი უნდა გამოიძიონ, რათა არ მოხდეს ბრალდებულების ერთი ხელის მოსმით და მხოლოდ ვიღაცის განცხადების გამო დასჯა. მე მჯერა სამართლიანობის და იმედი მაქვს ამას მივაღწევთ", - თქვა კარტინ დენევმა.

შეგახსენებთ, რომ დენევი და მისი მომხრეები ჰარვი ვაინშტაინსა და სხვა ბრალდებულებს ამართლებდნენ და ამბობდნენ, რომ ისინი ზედმეტადაც კი დაისაჯნენ.

"ისინი [სექსუალურ ძალადობაში ბრალდებული კაცები] უმოკლეს ვადებში დაისაჯნენ, იძულებულნი გახდნენ, მიეტოვებინათ სამუშაო, თუმცა, რასაც ისინი იქ აკეთებდნენ იყო მხოლოდ ის, რომ ეხებოდნენ ვიღაცის მუხლს, ცდილობდნენ მიეღწიათ კოცნისთვის ან განიხილავდნენ ინტიმურ თემებს სამუშაო შეხვედრის დროს", - ეწერა Le Monde-ში გამოქვეყნებულ განცხადებაში.

წერილის ავტორები ამბობდნენ, რომ სექსუალური ძალადობის წინააღმდეგ დაწყებული კამპანია ქალების დამოუკიდებლობის გაზრდას არ უწყობს ხელს.

"გაუპატიურება დანაშაულია, მაგრამ ფლირტი - ეს კრიმინალი არ არის. ჩვენ მხარს ვუჭერთ ფლირტის თავისუფლებას, რადგან ის სექსუალური თავისუფლების განუყოფელი ნაწილია. კამპანიები, რომლიც ქალებმა წამოიწყეს ნელ-ნელა პურიტანიზმს ემსგავსება", - ნათქვამია დენევისა და სხვა ასი ქალის განცხადებაში.

დენევი ერთადერთი პოპულარული ფრანგი მსახიობია, რომელმაც სექსუალურ შევიწროებაში დადანაშაულებული კაცების მხარი დაიჭირა.