ჰოლივუდის უცხოური პრესის ასოციაციამ ოქროს გლობუსის ნომინანტები უკვე დაასახელა.

საუკეთესო რეჟისორის კატეგორიაში არჩევანი ასე გადანაწილდა:

  • გილერმო დელ ტორო, The Shape of Water
  • მარტინ მაკდონაჰი, Three Billboards Outside Ebbing, Missouri
  • კრისტოფერ ნოლანი, Dunkirk
  • რიდლი სკოტი, All the Money in the World
  • სტივენ სპილბერგი, The Post

როგორც ხედავთ, დასახელებული კანდიდატებიდან ხუთივე რეჟისორი კაცია და წელსაც, ისევე როგორც თითქმის ყოველთვის, ნომინაცია ქალი რეჟისორისთვის ვერ გამოიძებნა.

მიუხედავად იმისა, რომ კომედიის ან მიუზიკლის ჟანრში გადაღებული საუკეთესო მხატვრული ფილმის ნომინაციაში გრეტა გერვიგის Lady Bird მოხვდა, ამერიკული პრესა უსმართლოს უწოდებს წლის ერთ-ერთი მთავარი კინომოვლენის რეჟისორის ნომინაციის გარეშე დატოვებას. განსაკუთრებით მას შემდეგ რაც ფილმმა საერთაშორისო და ადგილობრივი პრესისგან ყველაზე მაღალი შეფასება დაიმსახურა.

არასწორ გადაწყვეტილებად მიიჩნევენ იმასაც, რომ 2017 წლის ორი მთავარი კინოსურათის - Wonder Woman-ისა და Mudbound-ის რეჟისორები პატი ჯენკინსი და დიი რისი ასევე კონკურს გარეშე აღმოჩნდენ.

Lady Bird-ისთვის გრეტა გერვიგმა გლობუსის ოთხი ნომინაცია მიიღო, მათ შორის საუკეთესო სცენარისთვის. პრესა უკვე იმაზეც საუბრობს, რომ კატეგორიაში სრულიად უსაფუძვლოდ მოხვდა რიდლი სკოტის ფილმი All the Money in the World, ისიც მხოლოდ იმიტომ, რომ კინოსურათში კევინ სპეისის კადრები ამოჭრეს და მის მაგივრად კრისტოფერ პლამერი ჩასვეს.

ამასობაში კი ერთადერთი ქალი რეჟისორი, რომელმაც გლობუსი მოიპოვა ბარბარა სტრეიზანდი იყო 1984 წელს, ფილმისთვის Yentl, ნომინანტთა შორის კი სხვადასხვა პერიოდში იყვნენ კეტრინ ბიგელოუ, სოფია კოპოლა და ავა დიუვერნეი.

აქვე უნდა აღინიშნოს, რომ კეტრინ ბიგელოუ ამ დრომდე ერთადერთი ქალი რეჟისორია, რომელსაც ოსკარი აქვს მიღებული.

მიუხედავად იმისა, რომ ქალი რეჟისორებისთვის შესაბამის კატეგორიაში ადგილი ვერ გამოიძებნა, მათი ფილმები სხვადასხვა დოზით მაინც არიან წარმოდგენილნი გლობუსზე. მაგალითისთვის შეგვიძლია ავიღოთ ანჯელინა ჯოლის First They Killed My Father, რომელიც კამბოჯის სახელით უცხოენოვანი ფილმის ნომინაციაზე მოხვდა, ასევე ნორა ტუომეის ანიმაცია The Breadwinner და დოროთა კობიელას Loving Vincent.