იუტას უნივერსიტეტის მეცნიერებმა ხელის პროთეზის ინოვაციური მოდელი შექმნეს, რომელსაც ადამიანი გონებით მართავს და ამასთან ერთად, მგრძნობელობაც გააჩნია. ახალ პროთეზს 100-მდე შეგრძნების აღქმა შეუძლია, რაც ძალიან წინ გადადგმული ნაბიჯია.

ინოვაციური მოდელის მუშაობის პროცესი პროთეზის ნერვულ სისტემასთან დაკავშირებას გულისხმობს, რისთვისაც კუნთოვან ქსოვილებში ინერგება ელექტროიდები, რომელიც ქმნის ინფორმაციულ წრეს. ინფორმაციული ლუპი, როგორც მას მეცნიერები უწოდებენ, ტვინისთვის ინფორმაციის მიწოდების ფუნქციას ასრულებს, რომელიც საბოლოოდ გრძნობებად გარდაიქმნება.

„ადამიანების უმეტესობა ფიქრობს, რომ შეხება მხოლოდ ერთი გრძნობაა. სინამდვილეში, ის ისეთი გრძნობების გაერთიანების შედეგია, როგორიცაა - ვიბრაცია, ტემპერატურა, ტკივილი და სხვ. ჩვენი მოწყობილობა გვეხმარება, რომ მოვახდინოთ ამ ემოციების დანაწევრება ცალ-ცალკე და დავნერგოთ ისინი პროთეზის სხვადასხვა ნაწილში“, - ამბობს პროექტის ერთ-ერთი ავტორი ჯეიკობ ჯორჯი.

იუტას უნივერსიტეტის მეცნიერებმა, ახალი გამოგონება, ამ დროისთვის, შვიდ ადამიანზე გამოსცადეს. შედეგებმა მოლოდინსაც გადააჭარბა, ამიტომ გამომგონებლები უფრო დიდი ენთუზიაზმით აპირებენ მუშაობის გაგრძელებას.

მომავალში მსგავსი პროთეზის გამოგონება ფეხისთვისაც იგეგმება.