56 წლის კანადელი ქალი ანეტა პოტრესი ბრიტანეთის კოლუმბიის ტყეში ძაღლებს ასეირნებდა, როცა წაიქცა, დაშავდა და მობილური ტელეფონი დაკარგა.

ინტენსიური სამძებრო სამუშაოების შემდეგ, ის მაშველებმა თავის ძაღლებთან ერთად იპოვეს, რომლებიც მას უმძიმესი სამი დღის განმავლობაში გვერდიდან არ შორდებოდნენ.

როგორც ოჯახის წევრები იხსენებენ, ძაღლებმა ანეტასთვის მიწაში ხვრელი გათხარეს, სადაც პატრონთან ერთად თბილად ეძინათ. კოკისპირული წვიმის დროს, ანეტას დაბალბეწვიანი ბოქსიორი თავის მანტოში ჰყავდა გახვეული. ამ დღეების განმავლობაში ერთი ძაღლი დაკარგულ ქალს ათბობდა, მეორე მას იცავდა, მესამე კი საჭმელს ეძებდა.

ანეტას ქმარმა, მარსელმა მისი დაკარგვის დღიდან განაცხადა პოლიციაში. სამძებრო სამუშაოებში 100-ზე მეტი მაშველი და ორი ვერტმფრენი მონაწილეობდა. სამი დღისა და ორი ღამის შემდეგ, მაშველებმა ანეტას ძახილი გაიგეს.

მარსელის თქმით, დაკარგულები კარგად არიან, ანეტას კი საავადმყოფოდან მალე გამოწერენ და ოჯახი ცხოვრების ჩვეულ რიტმს დაუბრუნდება, თავის საყვარელ ძაღლებთან ერთად.