თბილისის ახლადარჩეულმა მერმა, კახა კალაძემ დეველოპერებთან შეხვედრისას განაცხადა, რომ მერიაში არსებული "ბიუროკრატიული მანქანა უნდა დაინგრეს და უფრო მოქნილი გახდეს".

"არქიტექტურის სამსახურში სტრუქტურული ცვლილებები იქნება. რეფორმები განხორციელდება, რაც ყველაზე მთავარი და მნიშვნელოვანია, ბიუროკრატიული მანქანა უნდა დავანგრიოთ. მერია უნდა გახდეს ადამიანებზე მორგებული, მოქნილი სამსახური. უნდა ემსახურებოდეს თბილისს და თბილისელებს გამართულად", – განაცხადა კალაძემ.

კალაძემ დეველოპერებს დედაქალაქის განვითარებაში ჩართულობისკენ და თანამშრომლობისკენ მოუწოდა. მისივე თქმით, ახლადაშენებული შენობა-ნაგებობის ფასადი უნდა იყოს მოპირკეთებული:

"მგონი, არც თქვენ მოგწონთ და გსიამოვნებთ არსებული მდგომარეობა, ის მშენებლობები, რომელიც მართლაც ამახინჯებს ქალაქის იერსახეს, თბილისს აქვს განსაკუთრებული სილამაზე და ხიბლი და ამ ყველაფერს შენარჩუნება და მოვლა-პატრონობა სჭირდება, რაშიც თქვენი როლი მნიშვნელოვანია".

რედიქსის გენერალური დირექტორის, ლაშა პაპაშვილის განცხადებით, დეველოპერები ზომების გამკაცრებას მიესალმებიან:

"ყველას გვინდა, რომ ქალაქის იერსახე არ იყოს ისეთი, როგორიც არის. გამარტივება, ერთხი მხრივ, მაგრამ გართულებას ვითხოვთ, მეორე მხრივ. თვითონაც მომხრე არიან იმისა, რომ არ შეიძლება ქალაქის ცენტრში ასეთი შენობები აშენდეს".

კახა კალაძემ, ასევე, ისაუბრა იმაზე, რომ საქართველოს მთავრობის მიერ მიღებულ 41-ე დადგენილებაში შემავალი ცვლილებები შენობა-ნაგებობის უსაფრთხოების წესების გამკაცრებას შეეხება.