აჭარის უმაღლესი საბჭოს თავმჯდომარის პოსტზე დავით გაბაიძე ცოტნე ანანიძემ შეცვალა.

ცოტნე ანანიძე აჭარის უმაღლეს საბჭოში ფრაქცია ქართულმა ოცნებამ წარადგინა. დავით გაბაიძემ თანამდებობა საკუთარი განცხადების საფუძველზე 30 მარტს დატოვა.

"ეს არ არის პრივილეგია, ეს არის პასუხისმგებლობა, მათ შორის, თითოეული თქვენგანის წინაშე და პასუხისმგებლობა საერთო მიზნებისა და ამოცანების მიმართ, რომელიც მოიცავს, პირველ რიგში, ხალხის სამსახურს.

ნებისმიერი მანდატი ეკუთვნის ხალხს და მინდა კიდევ ერთხელ განსაკუთრებული მადლობა გადავუხადო ჩვენს ხალხს გაკეთებული არჩევანისთვის. მათი არჩევანი არ იყო სასარგებლო ჩვენი გუნდისთვის, ეს იყო სასარგებლო ჩვენი სახელმწიფოსთვის, ჩვენი რეგიონისთვის და სწორედ აჭარამ იცის ყველაზე მეტად სტაბილურობის, სიმშვიდის, ეროვნულობის, ოჯახური ფასეულობების ფასი. აჭარის ტკივილიანი ისტორია და აჭარა არის საქართველოს მარადიულობის სიმბოლო," — განაცხადა ანანიძემ სიტყვით გამოსვლისას.