"NATO-თან ინტეგრაციის პროცესი ოცნებამ ინსტიტუციურად მოკლა" — ვკითხულობთ დროას ლიდერის, ელენე ხოშტარიას მიერ რუსთავის ქალთა ციხიდან გამოქვეყნებულ წერილში, რომელშიც NATO-ს 2025 წლის ანგარიშზე საუბრობს. მისი თქმით, ოპოზიციურმა ალიანსმა NATO-სთან კომუნიკაცია ალტერნატიული ხედვის გასამყარებლად ახლავე უნდა დაიწყოს.

"NATO-სთან ინტეგრაციის პროცესი ოცნებამ ინსტიტუციურად მოკლა. წლები დასჭირდა "ასპირანტის" სტატუსის მოპოვებას და საქართველოს პოტენციურ წევრად რეალურად აღქმას, რაც 2012 წლისთვის უკვე დოკუმენტურად იყო აღბეჭდილი. მხოლოდ ინერციაც კი იყო საკმარისი, რომ არ ჩამოშლილიყო.

დღევანდელი ანგარიში ასახავს ამ ჩამოშლას.

პარტნიორული ურთიერთობები, მათ შორის თავდაცვის სფეროში, NATO-ს 90-იანი წლების მერე, მთელ პოსტსაბჭოთა სივრცესთან ჰქონდა; PFP — Partnership For Peace ერქვა. ცენტრალური აზიის ქვეყნებსაც ჰქონდათ და აქვთ პარტნიორობა.

საქართველომ გადაინაცვლა 90-იანების ნიშნულზე, მაგრამ სრული პასუხისმგებლობით ვაცხადებ (8 წელი ვმუშაობდი ამაზე) ხელისუფლების ცვლილებების და ევროპული ინტეგრაციის პირობებში, სრულად ავინაზღაურებთ დანაკარგს და დავუბრუნდებით გაწევრიანების გზას, მით უმეტეს, შავი ზღვის და სამხრეთ კავკასიის ახალი გეოპოლიტიკური ვიათრების გათვალისწინებით.

ალიანსმა NATO-სთან კომუნიკაცია ახლავე უნდა დავიწყოთ ამ ალტერნატიული ხედვის გასამყარებლად.

ბოლომდე!

რუსთავის ქალთა ციხე", — სოციალურ ქსელში აქვეყნებს წერილს ელენე ხოშტარია

შეგახსენებთ, რომ 2026 წლის 26 მარტს მარკ რუტემ NATO-ს წლიური ანგარიში წარმოადგინა, რომელშიც საქართველოს შესახებაც არის ჩანაწერი. ანგარიშში წერია, რომ "NATO-საქართველოს თანამშრომლობის ელემენტები გადაფასდა პრიორიტეტების მიხედვით."

"წინსვლა იყო თავდაცვის სფეროში თანამშრომლობაში ქართულ თავდაცვის ძალებთან, რასაც ხაზი გაესვა მაისში ჩატარებული NATO-საქართველოს წარმატებული წვრთნით.

ალიანსმა ასევე გადახედა NATO-ს ჩართულობა საქართველოს მიმართ 2024 წლის საპარლამენტო არჩევნებისა და მისი შემდგომი პერიოდის გათვალისწინებით. შედეგად, NATO-საქართველოს თანამშრომლობის ელემენტები გადაფასდა პრიორიტეტების მიხედვით, მათ შორის NATO-საქართველოს არსებითი პაკეტის ზოგიერთი ასპექტის თვალსაზრისით.

ამავდროულად, წინსვლა იყო თავდაცვის სფეროში თანამშრომლობაში ქართულ თავდაცვის ძალებთან, რასაც ხაზი გაესვა მაისში ჩატარებული NATO-საქართველოს წარმატებული წვრთნით. NATO-ს საინფორმაციო ოფისი თბილისში, საქართველოში, აგრძელებდა აქტიურ ჩართულობას სამივე პარტნიორთან სამხრეთ კავკასიის რეგიონში", — ვკითხულობთ ანგარიშში

ქართული ოცნების ერთადერთი მაღალჩინოსანი, რომელმაც აღნიშნულზე კომენტარი გააკეთა შალვა პაპუაშვილია. მისი თქმით, "პრობლემა არის NATO-ში და არა მხოლოდ საქართველოსთან დაკავშირებით, არამედ ამერიკასთან დაკავშირებითაც".

"ჩვენც შეგვიძლია ვთქვათ იმის ფონზე, რაც საქართველომ გააკეთა NATO-სთვის სხვადასხვა მისიაში მონაწილეობით, თვითონ რომ არ მიდიოდნენ, ესტონეთები, ლატვიები და ლიეტუვები 50-50 კაცით რომ იყვნენ ავღანეთში და ჩვენ ვიყავით 1500-ით, ამის სანაცვლოდ ჩვენ ვერ ვხედავთ ადეკვატურ პასუხებს. ასე რომ, ბურთი არის მთლიანად, სრულად NATO-ს ტერიტორიაზე და თავად უნდა ჩამოყალიბდნენ, რა უნდათ საკუთარი ალიანსისგან", — განაცხადა შალვა პაპუაშვილმა ბრიფინგზე.