სოციალური სამართლიანობის ცენტრის ხელმძღვანელი, თამთა მიქელაძე ბიზნესმენი გიორგი რამიშვილის, იგივე "ზარალას" დაკავებას გამოეხმაურა და აღნიშნა, რომ "სილქ როუდ ჯგუფის", "სილქნეტის" და Euronews Georgia-ს დამფუძნებელი გიორგი რამიშვილის დაკავება შეიძლება რეჟიმის მიერ ბიზნესის სფეროსთვის ერთგულების მოთხოვნის მაჩვენებელი იყოს.

"როგორი ლინზით შეიძლება დავინახოთ, რაც ახლა ქართული ოცნების ყოფილი მაღალი თანამდებობის პირების და მსხვილი ბიზნესმენების თავს ხდება?!

ერთი შეხედვით, ეს შიდა ელიტური წმენდა და ლოიალურობის გაღრმავების მცდელობაა ქართული ოცნების ვერტიკალის გამყარებისთვის.

განსაკუთრებით მსხვილი ბიზნესმენის, გიორგი რამიშვილის, დაკავება შეიძლება აჩვენებდეს რეჟიმის მხრიდან პოლიტიკური სფეროდან უკვე ბიზნესის სფეროსთვის ერთგულების მოთხოვნის ღია გადანაცვლებას [მით უმეტეს, რომ გიორგი რამიშვილის საქმიანობა გამოირჩევა ნელთბილი აქტიურობით მედიის, საინფორმაციო და საზოგადოებრივ სფეროში].

თუმცა აშკარაა, რომ კორუფციასთან ბრძოლას და "დაზიანებული ბექგრაუნდის" მქონე ბიზნესების დასჯას ჯერ საკმარისი მადით ვერ ირგებს რეჟიმი, როგორც მორალური თვითწმენდის და თვითლეგიტიმაციის გაზრდის პროცესს," — დაწერა მიქელაძემ.

თამთა მიქელაძე აჭარის მთავრობის ყოფილი ხელმძღვანელის, თორნიკე რიჟვაძის მიერ თვითმკვლელობის მცდელობაზეც აკეთებს კომენტარს. მისი თქმით, მიმდინარე მოვლენები რეჟიმის სისუსტეზე მიუთითებს.

წმენდა ძალიან ახლო წრეში ხდება და ეშინიათ, რომ ამას მძიმე ელექტორალური ფასი შეიძლება ჰქონდეს. რიჟვაძის ტრაგედიამ (ნამდვილად მძიმე იყო ჩემთვის ამ ამბის გაგება დღეს) ამის მორალური ფასი კიდევ უფრო დაამძიმა.

ამავდროულად ყველაფერი რაც ხდება რეჟიმის სისუსტის ნიშანიცაა.

ვერ შეძლებ თან ოლიგარქიული ავტოკრატია აშენო და თან მხოლოდ შენ ჭამო.
ასეთი რეჟიმების ფუნქციონირების მატრიცაც ისაა, რომ სხვებიც უნდა დააკმაყოფილო, თუ გინდა, რომ წონასწორობა და კმაყოფილება შეინარჩუნო სისტემაში. თან ასეთ პატარა ქვეყანაში და ეკონომიკაში და ძალაუფლების დასუსტების ასეთ რეალობაში, რომელშიც ქართული ოცნებაა. [პუტინმა ოლიგარქების დაქვემდებარება მისი აღმავლობის ფაზაში 2000-იან წლებში დაიწყო და მათი სიმრავლის და დიდი მასშტაბების გამო ბალანსის მიდგომას მაინც იყენებდა].

ეს პროცესები შეიძლება ელიტური ალიანსების რღვევის და შიდა წინააღმდეგობების სახიფათო დასაწყისიც იყოს, საბოლოოდ. წმენდის პროცესებმა შეიძლება დააზიანოს ქართული ოცნების ისედაც შესუსტებული სოციალური ალიანსები რეგიონებში, განსაკუთრებით იმ ადგილებში, სადაც პოლიტიკური გავლენა ტრადიციულად პირად კავშირებს ეყრდნობოდა (აჭარა (რიჟვაძე), კახეთი (ღარიბაშვილი), ვანი (ლილუაშვილი) და ა.შ).

ამიტომ ივანიშვილის სიხარბე და ირაკლი კობახიძის სიხისტე შეიძლება საბოლოოდ მათი სისუსტის მთავარი მიზეზი აღმოჩნდეს. თუმცა, პროცესებს დალოდება სჭირდება", — დაწერა თამთა მიქელაძემ.

ცნობისთვის, შსს-ს ცნობით, 2025 წლის 7 ივლისს, საგარეჯოს "ჯეოჰოსპიტალსში", შეყვანილი იქნა აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა. საგარეჯოდან რიჟვაძე თბილისში, პირველ საუნივერსიტეტო კლინიკაში გამოიყვანეს

შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს. ფაქტთან დაკავშირებით მიმდინარეობს ინტენსიური საგამოძიებო მოქმედებები.

ასევე, ცნობისთვის, "სილქ როუდ ჯგუფის", "სილქნეტის" და Euronews Georgia-ს დამფუძნებელი გიორგი რამიშვილი ("ზარალა") გუშინ დააკავეს.

შსს-ს ცნობით, გიორგი რამიშვილი სისხლის სამართლის კოდექსის 236-ე მუხლის მე-3 მე-4 ნაწილით დააკავეს, რაც ცეცხლსასროლი იარაღის მართლსაწინააღმდეგო შეძენა, შენახვა, ტარებას გულისხმობს. გავრცელებული ინფორმაციით, ის თბილისის საერთაშორისო აეროპორტში დააკავეს.

დანაშაული 6-დან 10 წლამდე პატიმრობას ითვალისწინებს.

იხილეთ ასევე: