უპრეცენდენტო მეგა შოუ - თუ რამეს შეიძლება თამამად ასე ვუწოდოთ, სწორედ Rising Star, იგივე - ამომავალი ვარსკვლავია, რომელსაც რუსთავი 2-ის მაყურებელი ძალიან მალე იხილავს.

შოუს ორიგინალური ვერსია პირველად ისრაელში გავიდა, თუმცა მისმა პოპულარობამ ქვეყნის საზღვრები გადალახა და მსოფლიოს თითქმის ყველა ქვეყანაში ჩავიდა. მათ შორის, ყველაზე დიდი პოპულარობით პროექტი აშშ-ში სარგებლობდა, სულ მალე კი რუსთავი 2 პროექტის ქართულ ანალოგს ქართველ მაყურებელს გააცნობს.

ეს იქნება ერთადერთი პროექტი, რომელზეც მონაწილის ბედი თავიდან ბოლომდე მაყურებელზე იქნება დამოკიდებული, მათი გადასაწყვეტია ესა თუ ის მონაწილე გამოვა თუ არა სცენაზე და მიიღებს თუ არა მონაწილეობას მეგა შოუში, რომელიც, შესაძლოა, მისი წარმატებისკენ მიმავალ გზაზე ყველაზე დიდი ნაბიჯი აღმოჩნდეს.

შოუს ფაბულა მარტივია, ჟიურის წევრები აუდიტორიასთან ერთად უზარმაზარი ეკრანის წინ სხდებიან, რომლის მიღმაც შემსრულებელი დგას. სიმღერის დროს მაყურებელი და ჟიური ხმას აძლევს მონაწილეს და წყვეტს არის თუ არა ის ამომავალი ვარსკვლავი.

ახალ შოუს აქამდე არსებული პროექტებისგან ხმის მიცემის პროცესი განასხვავებს.

თუ აქამდე თქვენი ფავორიტის გავარდნის შემდეგ წუწუნებდით, რომ მის კონკურენტს გავლენიანი ნაცნობები ან "ფულიანი" მშობლები ჰყავს, ამ შემთხვევაში ეს მიზეზი აღარ გამოგადგებათ, რადგან ხმას არა მესიჯების, არამედ მობილური აპლიკაციით აძლევთ - მხოლოდ ერთხელ და ისიც უფასოდ. მშვენიერია არა?!

იმისათვის, რომ ამომავალმა ვარსკვლავმა შემდეგ ტურში გადასვლა შეძლოს, ამისთვის საჭიროა სიმღერის დროს ხმათა 70%-ზე მეტი დააგროვოს. თუმცა ეს არც თუ ისე მარტივია, შესაძლოა ხალხმა, რომელსაც სულაც არ მოსწონს თქვენი რჩეული, მას ცუდი შეფასება მისცეს და პროცენტული მაჩვენებელი დაწიოს. მოკლედ რომ ვთქვათ, საკმაოდ აზარტული პროცესი იქნება. იმ ადამიანთა სახეებს, რომლებიც კონკურსანტს ხმას მისცემენ, მთელი საქართველო იხილავს იმ დიდი ეკრანის საშუალებით, რომელიც მონაწილეს ჟიურის წევრებისგან ჰყოფს.