აშშ-ის სენატმა ეროვნული დაზვერვის დირექტორის თანამდებობაზე დონალდ ტრამპის მიერ წარდგენილი ტალსი გაბარდი დაამტკიცა — გაბარდი აშშ-ის პრეზიდენტის მიერ კაბინეტისთვის შერჩეული კანდიდატებიდან ერთ-ერთი ყველაზე მოულოდნელი არჩევანი იყო, მისი პოლიტიკური წარსულიდან გამომდინარე.

52 სენატორი კანდიდატურას დაეთანხმა, 48-მ კი უარი განაცხადა — გაბარდის წინააღმდეგ ხმა ერთადერთმა რესპუბლიკელმა სენატორმა, მიჩ მაკკონელმა მისცა. მაკკონელმა ეს გადაწყვეტილება ახსნა იმით, რომ წარსულში გაბარდმა არაერთხელ გააკეთა შემაშფოთებელი არჩევანი.

"არ შეიძლება ერი იმაზე დარდობდეს, რომ დაზვერვის შეფასებები, რომელთაც პრეზიდენტი მიიღებს, დამახინჯებული იქნება დირექტორის მიერ, რომლის წარსული შეფასებებიც შეშფოთებას იწვევს", — განაცხადა მაკკონელმა.

გაბარდის კანდიდატურის მიმართ კითხვის ნიშნებს იწვევდა მისი არასაკმარისი მხარდაჭერა უკრაინის მიმართ, ასევე 2017 წელს სირიის დიქტატორ ბაშარ ალ-ასადთან შეხვედრა და, არც მეტი, არც ნაკლები, საიდუმლო მასალების გაჟონვაში ბრალდებული ედვარდ სნოუდენის მხარდაჭერა.

გაბარდი ეროვნული გვარდიის ვიცე-პოლკოვნიკია და ორჯერ მსახურობდა ახლო აღმოსავლეთში. 2020 წელს ის პრეზიდენტობისთვის იბრძოდა. მას არა აქვს სადაზვერვო სამსახურებში მუშაობის გამოცდილება და არასოდეს უხელმძღვანელია სამთავრობო სააგენტოსთვის ან დეპარტამენტისთვის.