მოკლედ: სახელმწიფო უსაფრთხოების სამსახურმა, ჯგუფის მიერ წინასწარი შეთანხმებით დიდი ოდენობით ქრთამის აღების ფაქტზე, ჯანდაცვის სამინისტროს სსიპ-ის სამი ყოფილი თანამშრომელი დააკავა.

  • დაკავებულები არიან: საგანგებო სიტუაციების კოორდინაციისა და გადაუდებელი დახმარების ცენტრის ჰოსპიტალიზაციის ცვლის უფროსის ყოფილი მოადგილე და ჰოსპიტალიზაციის ორი ყოფილი მენეჯერი.
  • ასევე, უკანონო ქმედების ჩასადენად ქრთამის მიცემისათვის ორ პირს ბრალდება წარედგინა.

დეტალები: გამოძიებით დადგინდა, რომ დაკავებულებს, თანამდებობაზე ყოფნის დროს, კორუფციული გარიგება ჰქონდათ სააქციო საზოგადოება ვიანის ორ წარმომადგენელთან.

მათ პაციენტები, გადაუდებელ ჰოსპიტალიზაციის დროს, ელექტრონული მართვის პროგრამაში ხელოვნური ჩარევით, გადაჰყავდათ არა უახლოეს სამედიცინო დაწესებულებაში, არამედ ვიანის დაქვემდებარებულ კლინიკებში.

  • 2020 წლის 1 იანვრიდან 2023 წლის 31 ივლისის პერიოდში, დაკავებულებმა რამდენიმე ათასი პაციენტი გადაამისამართეს და ვიანის კლინიკებისაგან, ქრთამის სახით, ჯამში, 532 126 ლარი მიიღეს.
  • ასევე, კლინიკის ორმა წარმომადგენელმა პაციენტების მოზიდვისათვის, ბონუსის სახით, 149 010 და 76 771 ლარის შემოსავალი მიიღო.

ბოლო ხაზი: გამოძიება მიმდინარეობს მუხლით, რომელიც გულისხმობს წინასწარი შეთანხმებით ჯგუფის მიერ განსაკუთრებით დიდი ოდენობით ქრთამის აღებისა და უკანონო ქმედების ჩასადენად ქრთამის მიცემის ფაქტზე.

მუხლი 11-დან 15-წლამდე პატიმრობას ითვალისწინებს.