მაცხოვრის ბიბლიური ეკლესიას თბილისის საქალაქო სასამართლოს დასაბუთებული გადაწყვეტილება, საკულტო ნაგებობის მშენებლობის საკითხზე, რამდენიმე დღის წინ, 30 ივნისს ჩაბარდა. ამ გადაწყვეტილებით, სასამართლომ ბათილად ცნო საკულტო ნაგებობის სამშენებლო ნებართვაზე უარი და არქიტექტურის სამსახურს შესაბამისი აქტის გამოცემა დაავალდებულა. სასამართლო გადაწყვეტილების შესახებ ინფორმაციას ტოლერანტობისა და მრავალფეროვნების ინსტიტუტი ავრცელებს.

როგორც ორგანიზაციაში განმარტავენ, სასამართლომ გადაწყვეტილების მიღებისას შემდეგი გარემოებებით იხელმძღვანელა:

  • ადმინისტრაციული ორგანო არ იყო უფლებამოსილი მოეთხოვა რელიგიის საკითხთა სახელმწიფო სააგენტოს რეკომენდაცია;
  • რეკომენდაციის სურვილის შემთხვევაში, ადმინისტრაციულ ორგანოს თავად უნდა მიემართა შესაბამისი უწყებისთვის;
  • ქ. თბილისის მუნიციპალიტეტის მერის ბრძანება კანონის არასწორი გამოყენებით გამოიცა და შეზღუდა რელიგიური გაერთიანების უფლებები შეზღუდა.

"სასამართლოს გადაწყვეტილება სტრატეგიული მნიშვნელობისაა და კიდევ ერთხელ ადასტურებს მშენებლობის ნებართვის გაცემის პროცესში, ადმინისტრაციული ორგანოების მხრიდან არადომინანტური რელიგიური გაერთიანებებისთვის უკანონო დაბრკოლებების შექმნის ფაქტს," - აღნიშნავენ ტოლერანტობისა და მრავალფეროვნების ინსტიტუტში.

მათივე ინფორმაციით, რელიგიურმა ორგანიზაციამ, 2015 წელს, თბილისის მერიის არქიტექტურის სამსახურს საკულტო ნაგებობის მშენებლობის ნებართვის გაცემის მოთხოვნით მიმართა. ადმინისტრაციული წარმოების პროცესში, არქიტექტურის სამსახურმა განმცხადებლისგან მშენებლობის მიზანშეწონილობის თაობაზე რელიგიის საკითხთა სახელმწიფო სააგენტოს მიერ გაცემული რეკომენდაციის წარდგენა მოითხოვა. თბილისის მერიამ, არაუფლებამოსილი ორგანოს მიერ მომზადებული არასავალდებულო ხასიათის დოკუმენტის მოთხოვნით და ამის საფუძველზე, მშენებლობის ნებართვის არგაცემით, რელიგიური გაერთიანების უფლებები შეზღუდა.