ქართული ოცნების თავმჯდომარე, ირაკლი კობახიძე ევროპარლამენტარებს, ანდრიუს კუბილიუსისა და რასა იუკნევიჩიენეს კვლავ "სააკაშვილის მეგობრებად" და "ნაცმოძრაობის ლობისტებად" მოიხსენიებს. კობახიძე ამბობს, რომ მათ განცხადებებს მნიშვნელობა არც "ოცნებისთვის" და არც ხალხისთვის არ აქვს.

"კუბიულიუსის და რასას განცხადებას არ აქვს მნიშვნელობა არც ჩვენთვის, არც ქართული საზოგადოებისთვის. ეს არის დაახლოებით იგივე, გუბაზ სანიკიძემ და სალომე სამადაშვილმა რომ გააკეთონ ხვალ ერთობლივი განცხადება. არავითარი განსხვავება არ არის კუბილიუსს და გუბაზ სანიკიძეს შორის და რასას და სალომე სამადაშვილს, ან ვინმე, ნონა მამულაშვილს შორის", — თქვა მან.

გუშინ, 6 ივნისს ევროპარლამენტარებმა საქართველოს პოლიტიკურ პარტიებსა და ხალხს ღია წერილი მიმართეს და ევროკავშირის კანდიდატის სტატუსის მოლოდინის ფონზე ქვეყანაში არსებული ვითარება მიმოიხილეს.

განცხადების ავტორები წერდნენ, რომ საქართველოსთვის კანდიდატის სტატუსის მიღებაზე ევროკავშირის გადაწყვეტილების პროგნოზირება რთულია, თუმცა პოლიტიკურ პარტიებსა და საქართველოს მოსახლეობას "ნაკლებად პოზიტიური შედეგის" შემთხვევაში იმედი არ უნდა გაუცრუვდეთ და EU-ში გაწევრიანებისთვის ძალები გააერთიანონ.