დიდი ბრიტანეთის პრემიერმინისტრი, ბორის ჯონსონი უნდობლობის გამოცხადებას გადაურჩა. პარლამენტმა გადაწყვეტილება ფარული კენჭისყრით მიიღო. უნდობლობის გამოცხადებას 148 მომხრე და 211 წინააღმდეგი ჰყავდა.

უნდობლობის გამოცხადების შემთხვევაში მას პრემიერმინისტრის თანამდებობის დატოვება მოუწევდა, ამისთვის კი 180 კონსერვატორი დეპუტატის ხმა იყო საჭირო.

მანამდე ბრიტანეთის საგარეო საქმეთა მინისტრმა ლიზ ტრასმა განაცხადა, რომ ჯონსონს მთავრობის 100%-იანი მხარდაჭერა აქვს და იმავესკენ მოუწოდა თავის კოლეგებსაც. მისი თქმით, ჯონსონმა კორონავირუსი დაამარცხა, რუსეთის აგრესიის ფონზე მხარი დაუჭირა უკრაინას და დაშვებული შეცდომისთვის ბოდიშიც მოიხადა.

12 აპრილს ცნობილი გახდა, რომ ბორის ჯონსონსა და ხაზინის კანცლერს, რიში სუნაკს ლოქდაუნის წესების დარღვევის გამო დააჯარიმებდნენ.

ჯონსონებისა და სუნაკის სპიკერები აცხადებენ, რომ არ აქვთ ინფორმაცია იმის შესახებ, თუ რომელ მოვლენას უკავშირდება ჯარიმები. თუმცა, გავრცელებული ინფორმაციით, ისინი, ჯონსონის ცოლთან ერთად, რომელიც ასევე დაჯარიმდება, ერთსა და იმავე შეკრებაზე იმყოფებოდნენ, პრემიერმინისტრის დაბადების დღეზე, 2020 წლის ივნისში. საქმეს პოლიცია იძიებს.

ამ ინფორმაციის გავრცელების შემდეგ ოპოზიციის ზოგიერთი წარმომადგენელი აცხადებდა, რომ ჯონსონი და სუნაკი თანამდებობიდან უნდა გადამდგარიყვნენ.