ლიეტუვის ელჩი საქართველოში, ანდრიუს კალინდრა თბილისში, ევროკავშირის წარმომადგენლობის ოფისთან ჰომოფობიური და ძალადობრივი დაჯგუფების აქციას ეხმაურება და წერს, რომ გმობს დიპლომატიური კორპუსის აშკარა შეურაცხყოფას.

"მინდა გამოვხატო იმედგაცრუება და დავგმო აშკარა შეურაცხყოფა საქართველოში ჩემი კოლეგების, დიპლომატიური კორპუსის მიმართ, რომლებიც ღირსეულად წარმოადგენენ თავიანთ ქვეყნებს საქართველოში, ძალას არ იშურებენ საქართველოს დასახმარებლად ევროკავშირისა და ნატოსკენ მიმავალ გზაზე", — წერს კალინდრა.

დღეს ევროკავშირის წარმომადგენლობის ოფისთან მიმდინარე აქციაზე რამდენიმე ადამიანი დააკავეს, მათ შორის, ძალადობრივი და ჰომოფობიური ჯგუფის ლიდერი, გურამ ფალავანდიშვილი. არსებული ინფორმაციით, დაკავებულია 7 ადამიანი.

შინაგან სამინისტროს ცნობით, აქციის მონაწილეები ადმინისტრაციულ სამართალდარღვევათა კოდექსის 177-ე და 166-ე მუხლებით არიან დაკავებულები, რაც პოლიციელისადმი დაუმორჩილებლობასა და წვრილმან ხულიგნობას გულისხმობს.