პირველი ივლისიდან თბილისსა და რეგიონებში ბიზნესისთვის გაზის ტარიფი იზრდება. უფრო კონკრეტულად, თბილისი ენერჯი დედაქალაქში არასაყოფაცხოვრებო მომხმხარებლებისთვის ტარიფს 25 თეთრით, ხოლო სორკარ ჯორჯია გაზი რეგიონებში 23 თეთრით აძვირებს. თბილისში ბიზნეს-სუბიექტებისთვის კუბური მეტრი გაზი 1,35 ლარი, ხოლო რეგიონებში 1,38 ლარი ეღირება.

თბილისი ენერჯიში გაზის ტარიფის ზრდის გადაწყვეტილებას იმპორტის გაძვირებით ხსნიან. თბილისში ბიზნესისთვის კუბურ მეტრზე აქამდე მოქმედი ტარიფი 1,1 ლარი იყო.

"ბოლო პერიოდში ბუნებრივი გაზის ფასი მსოფლიო ბაზარზე მკვეთრად გაიზარდა და ზრდის ტენდეცია დღემდე შენარჩუნებულია. მიუხედავად ამისა, ქართული ბიზნესის განვითარების ხელშეწყობისთვის, შპს თბილისი ენერჯი დღემდე ცდილობდა საკუთარი რესურსებით დაებალანსებინაბუნებრივი გაზის შესაძენ და სარეალიზაციო ფასებს შორის წარმოქმნილი სხვაობა, რათა თავიდან აერიდებინა ტარიფის გაზრდა.

იმის გათვალისწინებით, რომ არასაყოფაცხოვრებო დანიშნულების გაზის შესასყიდი ფასი 2022 წლის 1-ლი ივლისიდან შპს თბილისი ენერჯისთვის კვლავ იზრდება, კომპანია იძულებულია არასაყოფაცხოვრებო აბონენტებისთვის ფასი დააკორექტიროს, რათა არ შეფერხდეს ბუნებრივი გაზის შესყიდვის პროცესი და მომხმარებლების უწყვეტი გაზმომარაგება.

ზემოაღნიშნულიდან გამომდინარე 2022 წლის 1-ლიივლისიდან კომპანიის არასაყოფაცხოვრებო მომხმარებლისათვის მისაწოდებელი ბუნებრივი გაზის ფასი ერთ კუბურ მეტრზე განისაზღვრება 1,35 ლარის ოდენობით, დამატებული ღირებულების გადასახადის ჩათვლით", — ნათქვამია თბილისი ენერჯის განცხადებაში.

თბილისი ენერჯის მსგავსად სოკარ ჯორჯიაშიც გაზის გაძვირების მიზეზად საერთაშორისო ბაზარზე არსებული ფასის აწევას ასახელებენ. აღსანიშნავია, რომ კომპანიამ ბიზნესისთვის გაზი 2021 წლის დეკემბერშიც გააძვირა.

"2022 წლის 1 ივლისიდან შპს სოკარ ჯორჯია გაზის და საქორგგაზის საცალო არასაყოფაცხოვრებო მომხმარებლებისთვის 1 კუბური მეტრი ბუნებრივი გაზის ფასი განისაზღვრება 1,38 ლარით დღგ-ს ჩათვლით.

ბუნებრივი გაზის ბაზარზე არსებული რეალობის შესაბამისობაში მოყვანის მიზნით, რაც განპირობებულია მსოფლიო ბაზარზე ენერგომატარებლებზე ფასების მკვეთრი ცვლილებით, მიღებულ იქნა გადაწყვეტილება არასაყოფაცხოვრებო მომხმარებლებისათვის ბუნებრივი გაზის ფასის კორექტირებაზე", — წერია სოკარ ჯორჯია გაზის განცხადებაში.

ორივე კომპანიაში ხაზგასმით აცხადებენ, რომ საყოფაცხოვრებო მომხმარებლებისთვის გაზის ტარიფი უცვლელი რჩება.