ქართული ოცნების თავმჯდომარე, ირაკლი კობახიძე ამბობს, რომ ღიმილისმომგვრელია იმაზე საუბარი, რომ ევროკავშირმა საქართველოს უარი "სახელმწიფოზე გადამტერებული, ეკლესიის მაგინებელი კრიმინალის გამო" უთხრას.

"საუბარი იმაზე, რომ ევროკავშირმა საქართველოს კანდიდატობაზე უარი ერთი სახელმწიფოზე გადამტერებული და ეკლესიის მაგინებელი კრიმინალის გამო შეიძლება უთხრას, რომელიც 9-წლიანი დანაშაულებრივი რეჟიმის ერთ-ერთი მთავარი შემოქმედი და იდეოლოგი იყო, რომელიც ქართული პოლიტიკის პოლარიზაციაში საკვანძო როლს ასრულებს და რომელმაც ტელეკომპანია რუსთავი 2 7 მილიონით გაძარცვა, უბრალოდ ღიმილისმომგვრელია და ეს ვერსია სერიოზულ განხილვას არ ექვემდებარება", — თქვა მან.

მმართველი პარტიის თავმჯდომარე ამბობს, რომ უკრაინაში წინა ორ პრეზიდენტზე სისხლის სამართლის საქმეა აღძრული, ხოლო მოლდოვაში წინა პრეზიდენტზე სისხლის სამართლის საქმე ევროკავშირის წევრობაზე განაცხადის შეტანის შემდეგ აღძრეს. მისი თქმით, ნიკა გვარამია და მიხეილ სააკაშვილი ბევრად უფრო მძიმე დანაშაულებში არიან ბრალდებული.

კობახიძე თქმით, თუ საქართველო ევროკავშირისგან კანდიდატის სტატუსს არ მიიღებს, ეს ისეთივე ალოგიკური გადაწყვეტილება იქნება, როგორც უკრაინის მიერ საქართველოდან ელჩის გაწვევა.

ის, ასევე, აღნიშნავს, რომ სტატუსის მინიჭება ევროკავშირის მხრიდან მნიშვნელოვანი პოლიტიკური გზავნილი იქნება. მისი თქმით, ამით, ერთი მხრივ, ევროკავშირის სოლიდარობას გამოხატავს იმ ქვეყნების მიმართ, რომელიც რუსული ოკუპაციის ქვეშაა, ხოლო, მეორე მხრივ, ევროკავშირი განაცხადებს, რომ "არ ეშინია რუსული რეაქციის".

"რისთვის შეიძლება უღირდეს ევროკავშირს ამის საპირისპირო გზავნილის გაჟღერება, სრულიად გაუგებარია. ეს არის კიდევ ერთი მიზეზი იმისა, რომ ევროკავშირის უარი სრულიად ალოგიკური იქნებოდა. ევროკავშირის მხრიდან, ეს იქნებოდა ზუსტად ისეთივე ალოგიკური გადაწყვეტილება, როგორც უკრაინის ხელისუფლების მიერ საქართველოდან ელჩის გაწვევა იყო", — ამბობს კობახიძე.