ქართული ოცნების თავმჯდომარის, ირაკლი კობახიძის განცხადებით, უკრაინისთვის სამხედრო მხარდაჭერის რაიმე ფორმა არ განიხილება. მისი ტქმით ეს გამორიცხულია. ამის შესახებ მან იმედის კვირის ეთერში ისაუბრა.

"ჩვენი მხარდაჭერა იქნება პოლიტიკური, იქნება ჰუმანიტარული, მაგრამ რაც შეეხება სამხედრო მხარდაჭერის რაიმე ფორმას, ეს, რა თქმა უნდა, არ განიხილება და ეს ჩვენი მხრიდან არის, ბუნებრივია, გამორიცხული", — ამბობს ის.

მისი თქმით, სამხედრო მხარდაჭერა აღქმული იქნება ისე, "როგორც იქნება", თუმცა არ დაუკონკრეტებია, როგორ იქნება აღქმული. მისი თქმით, ვინც ამაზე საუბრობს, მიმართულია, რომ საქართველოში "გაიხსნას მეორე ფრონტი.

"ნებისმიერი მხარდაჭერა, რომელიც დაკავშირებულია პირდაპირი ფორმით, ამ შემთხვევაშიც, სამხედრო მოქმედებებთან, რა თქმა უნდა, იქნება აღქმული ისე, როგორც იქნება აღქმული. შესაბამისად, ვინც ამას ითხოვს და ვინც აქეთკენ მოგვიწოდებს, ზოგი უნებლიეთ, მაგრამ ბევრი ნებსით, სწორედ იქითკენ არის მიმართული, რომ საქართველოში გაიხსნას მეორე ფრონტი, რასაც ჩვენ არ დავუშვებთ, არც ერთ შემთხვევაში", — თქვა კობახიძემ.