საფრანგეთისა და გერმანიის ლიდერები ემანუელ მაკრონი და ოლაფ შოლცი აზოვსტალის პატიმრების გათავისუფლებას ითხოვენ. ამის შესახებ რუსეთის პრეზიდენტ ვლადიმერ პუტინს სატელეფონო საუბრისას განუცხადეს.

"საფრანგეთის პრეზიდენტმა და გერმანიის კანცლერმა მოითხოვეს რუსული ძალების მიერ სამხედრო ტყვედ აყვანილი აზოვსტალის 2 500 დამცველის გათავისუფლება", — ციტირებს BBC საფრანგეთის პრეზიდენტის ადმინისტრაციას.

კანცლერი ოლაფ შოლცი და საფრანგეთის პრეზიდენტი ემანუელ მაკრონი "თავიანთი ინიციატივით" 80 წუთის განმავლობაში ესაუბრებოდნენ პუტინს. ორი ქვეყნის ლიდერმა პუტინს ზელენსკისთან პირდაპირი დიალოგისკენაც მოუწოდეს.

კრემლის ცნობით, პუტინმა სატელეფონო საუბრისას თქვა, რომ მზად არის ეძებოს გზები უკრაინის პორტებში ჩარჩენილი მარცვლეულის გადასაზიდად. პუტინმა მაკრონსა და შოლცს ასევე უთხრა, რომ რუსეთი მზადაა, გაზარდოს სასუქებისა და სოფლის მეურნეობის სხვა პროდუქტების ექსპორტი, თუ მასზე სანქციები მოიხსნება. ეს შეთავაზება რამდენიმე დღის წინ პუტინმა იტალიისა და ავსტრიის ლიდერებსაც წარუდგინა.