პრემიერმინისტრი ისევ იმეორებს, რომ რუსეთისადმი ეკონომიკური სანქციები არ დაუწესებიათ და არც აპირებს. ირაკლი ღარიბაშვილმა მიზეზად ამჯერადაც "ეროვნული ინტერესების დაცვა" დაასახელა. ამის შესახებ მან პარლამენტში ისაუბრა, სადაც ინტერპელაციის პროცედურით არის დაბარებული.

"მე არაერთხელ განვაცხადე, რომ ჩვენი მთავრობის პოზიცია არის ნაკარნახები, რა თქმა უნდა, ჩვენი ეროვნული ინტერესებიდან გამომდინარე. ჩვენი მთავარი ამოცანა უნდა იყოს ჩვენი მოქალაქეების დაცვა პირველ რიგში და ჩვენი სახელმწიფო ინტერესების დაცვა.

მე მინდა ვთქვა, იმის მიუხედავად, რომ საქართველოს ეროვნულ დონეზე, ანუ ჩვენ ეკონომიკური სანქციები არ დაგვიწესებია რუსეთის წინააღმდეგ და ამას არც გავაკეთებთ ჩვენი ეროვნული ინტერესების გათვალისწინებით, რა თქმა უნდა, ჩვენ ეს არაერთხელ განგვიცხადებია და მინდა კიდევ ერთხელ ამ ტრიბუნიდან განვაცხადო, რომ ჩვენ არ დავუშვებთ არერთი სანქცირებული ინდივიდისა, თუ კომპანიის უკანონო საქმიანობას საქართველოს ტერიტორიაზე", — განაცხადა მან.

ჯერ კიდევ 25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება. 28 თებერვალს კი მან აღნიშნა, რომ სანქციები ეფექტურად არ მიაჩნია.

დღეს პლენარულ სხდომაზე პარლამენტის რეგლამენტის 149-ე მუხლის მე-5 პუნქტის თანახმად ინტერპელაციის პროცედურა იმართება. ინტერპელაციის წესით დეპუტატების შეკითხვებს უკვე უპასუხა საგარეო საქმეთა მინისტრმა, ილია დარჩიაშვილმა.

ამ წუთებში დეპუტატების კითხვებს პასუხობს ირაკლი ღარიბაშვილი. მოგვიანებით კი პარლამენტის წინაშე ეკონომიკის მინისტრი, ლევან დავითაშვილი და იუსტიციის მინისტრი, რატი ბრეგაძე წარსდგებიან.