საგარეო საქმეთა მინისტრმა, ილია დარჩიაშვილმა პარლამენტში ინტერპელაციის წესით დეპუტატების მიერ დასმულ შეკითხვებს უპასუხა, მათ შორის, ერთ-ერთი კითხვა ეხებოდა რა მოლოდინები არსებობს ევროკავშირის მხრიდან კანდიდატი ქვეყნის სტატუსის მინიჭებასთან დაკავშირებით. მინისტრის განცხადებით, ამ ეტაპზე, პროგნოზის გაკეთება რთულია.

"მოცემულ ეტაპზე რთულია კონკრეტული პროგნოზის გაკეთება. მაშინ, როდესაც საქმე ეხება პოლიტიკურ გადაწყვეტილებას, რომელსაც ევროკავშირის 27 წევრი ქვეყნის ერთხმად მხარდაჭერა სჭირდება.

აპლიკანტი ქვეყნის მზაობის პარალელურად, საქართველო აკმაყოფილებს ამისთვის აუცილებელ პარამეტრებს და მზადაა, მიიღოს ევროკავშირის კანდიდატის ქვეყნის სტატუსი. მეტიც, ის ამას ნამდვილად იმსახურებს", — აღნიშნა მან.

მინისტრის თქმით, ამგვარი გადაწყვეტილება მოითხოვს ევროკავშირის მზაობასაც, ორგანიზაციის კარი გაუღოს ახალ წევრებს. თუმცა აქვე დაამატა, რომ წევრ ქვეყნებს შორის ევროკავშირის გაფართოების მიმართულებით არსებობს სხვადასხვა მოსაზრება.

"ამასთან, საქართველოს მიერ კითხვარის შევსება გაწევრიანების მხოლოდ ერთ-ერთი, საწყისი პროცედურული ეტაპია და მნიშვნელოვანია, ის უფრო ფართო კონტექსტში განვიხილოთ ყველამ.

ცალსახაა და ეს ევროკავშირის ოფიციალური ანგარიშებით განცხადებებით დასტურდება, ჩვენს შორის არსებული თანამშრომლობის დონითაც დასტურდება, რომ საქართველო ყოველთვის იყო ლიდერი, რეფორმატორი ქვეყანა აღმოსავლეთ პარტნიორობის რეგიონში, რაც განპირობებული იყო ასოცირების შეთანხმების ფარგლებში წარმატებული საკანონმდებლო და ინსტიტუციური დაახლოებითაც", — განაცხადა დარჩიაშვილმა.

მისივე განცხადებით, საქართველოს მზაობა დასტურდება ბოლო წლებში გამოქვეყნებული არაერთი საერთაშორისო ანგარიშითაც.

"გარდა ამისა, პარალელების გავლება ხდება დასავლეთ ბალკანეთის ქვეყნებთან და დასტურდება, რომ საქართველო რეფორმების განხორციელების მხრივ არამხოლოდ უტოლდება არამედ ბევრი მიმართულებით უსწრებს გაწევრიანების პროცესში მყოფ დასავლეთ ბალკანეთის ქვეყნებს", — განაცხადა მან.

ქართული ოცნების დეპუტატის, მამუკა მდინარაძის დამაზუსტებელ კითხვაზე, დამატებით განემარტა, რა მოლოდინი არსებობს, რა მოლოდინებია იმ საუბრებიდან და შეხვედრებიდან გამომდინარე, რასაც აწარმოებენ, მინისტრმა უპასუხა:

"აუცილებლად მნიშვნელოვანია ხაზი გავუსვათ, რომ ეს იქნება პოლიტიკური გადაწყვეტილება, რომელსაც მიიღებენ კონსენსუსის პრინციპით, ჩვენი ევროპელი პარტნიორები.

თუმცა, თქვენი კითხვის საპასუხოდ, მინდა გითხრათ, რომ ორმხრივ ფორმატებში გამართული ყველა შეხვედრა, რომელიც საგარეო საქმეთა მინისტრის, ჩემი სახით იმართება, საქართველოს პრემიერმინისტრის მიერ გამართული ორმხრივი შეხვედრები ჩვენს ევროპელ პარტნიორებთან, ევროკავშირის წევრ ქვეყნებთან, ყველა შეხვედრა არის ოპტიმიზმით სავსე", — თქვა დარჩიაშვილმა.

მისი თქმით, თითოეული პარტნიორის მხრიდან, რომელიც წლების განმავლობაში მხარს უჭეერდა საქართველოს, ეს განწყობები კვლავ ადგილზეა, არსად არ წასულა.

"შესაბამისად, ეს გვაძლევს ჩვენ დიდ ოპტიმიზმს, იმისა, რომ ჩვენი პარტნიორები, როდესაც დადგება გადაწყვეტილების მიღების დრო, მათ ექნებათ თავისი კონკრეტული ხმა საქართველოს ევროპული პერსპექტივის აღიარებისთვის", — აღნიშნა საგარეო საქმეთა მინისტრმა.