საქსტატის ინფორმაციით, 2021 წელს საქართველოში სიღარიბის აბსოლუტურ ზღვარს ქვევით მყოფი მოსახლეობის წილი (აბსოლუტური სიღარიბის მაჩვენებელი) წინა წლის ანალოგიურ პერიოდთან შედარებით 3,8 პროცენტული პუნქტით, 17,5%-მდე შემცირდა.

ფოტო: საქსტატი

ანგარიშის მიხედვით, 2021 წელს აბსოლუტური სიღარიბის მაჩვენებელი ქალაქის ტიპის დასახლებებში 2,1 პროცენტული პუნქტით, 15%-მდე, ხოლო სოფლის ტიპის დასახლებებში 6,3 პროცენტული პუნქტით, 21,3%-მდე არის შემცირებული.

უწყების ინფორმაციით, 2021 წელს, სიღარიბის აბსოლუტური მაჩვენებელი წინა წელთან შედარებით შემცირებულია მოსახლეობის ყველა ასაკობრივ ჯგუფში: კერძოდ, 18 წლამდე ასაკობრივ ჯგუფში მაჩვენებელმა 22,7% შეადგინა (-3,7 პროცენტული პუნქტი), 18-64 წლის ჯგუფში — 17.3% (-3.9 პროცენტული პუნქტი), ხოლო 65 წლის და უფროსი ასაკის ჯგუფში — 11,9% (-3,5 პროცენტული პუნქტი).

ამასთან, 2021 წელს მედიანური მოხმარების 60%-ის ქვევით მყოფი მოსახლეობის წილი 0,8 პროცენტული პუნქტით შემცირდა და 18,9%-ს გაუტოლდა, ხოლო მედიანური მოხმარების 40%-ის ქვევით მყოფი მოსახლეობის წილი 0,4 პროცენტული პუნქტით გაიზარდა და 7,4% შეადგინა.

ამის პარალელურად, საქართველოში შემწეობის მიღებთა რაოდენობა ბოლო ერთ წელში 106 501 ადამიანით არის გაზრდილი, რასაც ჯანმრთელობისა და სოციალური დაცვის სამინისტროში ბენეფიციართა შეფასებაზე გამოცხადებულ მორატორიუმს უკავშირებენ. აპრილში შემწეობა 652 124 ადამიანმა მიიღო.