კლინიკა ვივამედის ექსპრეზიდენტ, მიხეილ სააკაშვილზე განცხადებას აქვეყნებს, რომელშიც ნათქვამია, რომ სტაციონარში ყოფნის პერიოდში, მისი ჯანმრთელობის მდგომარეობა არ გაუარესებულა.

"ლაბორატორიული მონაცემები დინამიკაში სტაბილურია, ნაწილი ინსტრუმენტული გამოკვლევების შედეგები უარყოფითი დინამიკის გარეშეა. მაგნიტურ-რეზონანსული ტომოგრაფიაზე ნანახი ცვლილებები ხანდაზმულია, არ არის კავშირში პაციენტის ამჟამინდელ მდგომარეობასთან და არ საჭიროებს აქტიურ სამედიცინო ჩარევას. რეკომენდირებულია დინამიკაში დაკვირვება", — ამბობენ ისინი.

განცხადებაში აღნიშნულია, რომ ლაბორატორიული მონიტორინგი გრძელდება. ასევე, სააკაშვილს ჩატარებული აქვს მრავალი კვლევა. კლინიკაში კვლევების გახანგრძლივების მიზეზად "პროცედურულ საკითხებს", კერძოდ კი პაციენტისგან ნებართვის აღებას ასახელებენ. ამასთან, როგორც ისინი ამბობენ, მედიაში გავრცელებული ინფორმაცია, რომ კლინიკას დიაგნოზი დასმისა და პაციენტის მართვის უნარი არ შესწევს, აბსურდული და შეურაცხმყოფელსია.

"ყოვლად მიუღებელია კლინიკაზე და კლინიკის ექიმებზე ზეწოლა, მათ კომპეტენციებში ეჭვის შეტანა და პაციენტის ჯანმრთელობასთან დაკავშირებული ცრუ ინფორმაციების გავრცელება. გულდასაწყვეტია და კითხვის ნიშნებს ბადებს ცალკეული ექიმების მხრიდან რეალობას მოწყვეტილი ისტერიული ინფორმაციის ტირაჟირება, რომ პაციენტი არ არის კონტაქტური, ვერ გადაადგილდება, მდგომარეობა არის კრიტიკული და ა.შ", — ვკითხულობთ განცხადებაში.

დღეს, 24 მაისს სააკაშვილმა დაწერა, რომ კვლევით ხერხემალზე ტრავმა დაუდგინდა. მისი შეფასებით, ეს დაზიანება გლდანში ძალის გამოყენებით გადაყვანისას მიიღო. სააკაშვილი თქმით, ზურგის არეში ძლიერი ტკივილები აქვს.

სააკაშვილი ამ დროისთვის ვივამედში იმყოფება, ოჯახი მის საზღვარგარეთ გადაყვანას ითხოვს. ასევე ადვოკატები ამბობენ, რომ ელოდებიან ექსპერტების დაშვება.