საერთაშორისო ორგანიზაცია, რეპორტიორები საზღვრებს გარეშე (RSF) აცხადებს, რომ ნიკა გვარამიას საქმე უპრეცედენტო და, სავარაუდოდ, პოლიტიკურია და მის გადახედვას ითხოვს. განცხადებაში ვკითხულობთ, რომ RSF შეშფოთებულია საქართველოში დამოუკიდებელი და ოპოზიციური მედიის მიმართ მზარდი საფრთხეებით.

"ასეთი საეჭვო საფუძვლების საქმეზე განაჩენისა და სასჯელის სიმძიმე მიუთითებს იმაზე, რომ ის პოლიტიკურად მოტივირებული იყო ოპოზიციური მედიის დასუსტების მიზნით", — ამბობს RSF-ის აღმოსავლეთ ევროპისა და ცენტრალური აზიის ოფისის ხელმძღვანელი, ჟან კაველიერი.

კაველიერის თქმით, ბოლო წლებში საქართველოს ხელისუფლებამ გამოავლინა არამხოლოდ გარკვეული პასიურობა მედიის წარმომადგენლებზე თავდასხმებისას, არამედ მზადყოფნა, შეაფერხოს ოპოზიციური ჟურნალისტების მუშაობა.

"მოვუწოდებთ სასამართლოებს, დაუყონებლივ ჩაატარონ ნიკა გვარამიას საქმის დამოუკიდებლად განხილვა და მოვუწოდებთ ხელისუფლებას, შეასრულოს თავისი საერთაშორისო ვალდებულებები, რათა უზრუნველყოს უსაფრთხო გარემო საქართველოში ყველა მედიასაშუალებისთვის", — ამბობს კაველიერი.

RSF განცხადებაში აღნიშნავს, რომ მთავარი არხის ჟურნალისტებს საქმიანობაში ხელს უშლიდნენ და ავიწროებდნენ ქართული ოცნების წევრები, მათ შორის ვიცე-პრემიერი და კულტურის მინისტრი თეა წულუკიანი და თბილისის მერი კახა კალაძე.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: