საპარლამენტო ოპოზიცია ქართული ოცნების თავმჯდომარის ბრალდებას ეხმაურება, რომ ოპოზიციიდან კონკრეტული პოლიტიკოსები "ევროკავშირში საქართველოს კანდიდატობის წინააღმდეგ აგიტაციას" აწარმოებენ. დეპუტატი, გიორგი ვაშაძე კობახიძეს მტკიცებულებების ჩვენებას ან საჯაროდ ბოდიშის მოხდისკენ მოუწოდებს.

"მას ვუთხრა, რომ კონკრეტულად დაასახელოს სახელი და გვარები იმ დეპუტატების თუ იმ ოპოზიციონერების, ვინც დადიან და მეორე, მოიტანეთ მტკიცებულებები ამ ბრალდებების. იმიტომ, რომ ირაკლი კობახიძე და მთლიანად ქართული ოცნება მიეჩვია ტყუილების რახა-რუხს პრესკონფერენციებზე ყოველგვარი მტკიცებულებების გარეშე. და თუ ამის მტკიცებულება არ გაგაჩნიათ ქართულ ოცნებას, თუ ამის მტკიცებულებას დღეს არ მოიტანს ირაკლი კობახიძე, მოვითხოვ მისგან, საჯარო ბოდიში მოუხადოს ყველა ოპოზიციონერს, ბოდიში მოუხადოს აბსოლუტურად ყველას", — თქვა მან.

სახელებისა და გვარების დასახელებისკენ მოუწოდებს კობახიძეს მოქალაქეების ერთ-ერთი ლიდერი ლევან იოსელიანიც. დეპუტატის თქმით, მსგავსი ტიპის განცხადებები პირადად მისთვის შეურაცხმყოფელია.

"ასეთი ბრალდებები, ჩემთვის მაგალითად, პერსონალურად შეურაცხმყოფელია. მე მაინტერესებს ვინ არიან ეს ადამიანები, მათ, ალბათ, აქვთ სახელი და გვარები და ეს სახელები და გვარები უნდა ითქვას", — განაცხადა იოსელიანმა.

მისივე თქმით, ოპოზიციის სხვა წევრებთან ერთად, ევროკავშირის ხელმძღვანელობის სახელზე საერთო წერილი მოამზადეს, რათა საქართველოს კანდიდატის სტატუსის მიღებაზე ოპოზიციის მხარდაჭერა დააფიქსირონ. იოსელიანი დასძენს, რომ წერილი მალე გასაჯაროვდება.

"მინდა იცოდეს ყველამ, რომ როგორი განსხვავებული აზრიც არ უნდა გაგვაჩნდეს მმართველ პარტიასთან ბევრ საკითხში, არის საკითხები, რაც ჩემთვის, როგორც მოქალაქისთვის, როგორც ოპოზიციონერისთვის და ზოგადად, ყველაფერზე უფრო მაღლა დგას — ეს არის ჩვენი ქვეყნის ევროპული მომავალი. ამ სულისკვეთებაში ჩემი კოლეგები ჩემთან ერთად არიან და ჩვენ ვართ ერთიანი და ამ ერთიანობას ამ დოკუმენტზე ხელმოწერით აუცილებლად დავადასტურებთ", — აღნიშნა მან.

როგორც კობახიძემ გუშინ, 23 მაისს თქვა, აქვს ინფორმაცია, რომ კონკრეტული პოლიტიკოსები "რადიკალური ოპოზიციიდან დერეფნებსა და კაბინეტებში დადიან" და ევროკავშირში საქართველოს კანდიდატობის წინააღმდეგ აგიტაციას აწარმოებენ.