ადამიანის უფლებათა კომიტეტის თავმჯდომარის, მიხეილ სარჯველაძის განცხადებით, ქალთა მიმართ ჩადენილი შემზარავი დანაშაულები, უნდა გვაფიქრებდეს იმაზე, თუ რისი გაკეთება შეგვეძლო და ვერ შევძელით. მისი თქმით, უნდა გაათმაგდეს ძალისხმევა, რათა ქალთა მიმართ ძალადობა ამოიძირკვოს ჩვენი საზოგადოებიდან.

"ბოლო დღეებში ჩვენ ვიხილეთ ქალთა მიმართ ჩადენილი შემზარავი დანაშაულები. ასეთი საზარელი და მხეცური ფაქტები უნდა გვაფიქრებდეს იმაზე, თუ რისი გაკეთება შეგვეძლო და ვერ შევძელით, რათა ასეთი ფაქტები აგვეცილებინა თავიდან. დიახ, უნდა გაათმაგდეს ჩვენი ძალისხმევა იმისთვის, რომ ფემიციდი, ქალთა მიმართ ძალადობა ზოგადად, ამოიძირკვოს ჩვენი საზოგადოებიდან საშვილიშვილოდ, სადაც მას ჩვენდა საუბედუროდ და სამარცხვინოდ მაინც მკვიდრად აქვს ფესვები გადგმული. ჩვენი სამძიმარი გარდაცვლილს და მთლიანად საზოგადოების სახელით ბოდიში გარდაცვლილის ახლობლებს, მათ შორის შვილებს", — თქვა მან პარლამენტში.

21 მაისს თბილისში ქმარმა ცოლი ავტობუსში, შვილების თვალწინ მოკლა. საქალაქო სასამართლომ კაცს პატიმრობა შეუფარდა.

დღეს კი ავტობუსის გაჩერებასთან ქმარმა ცოლი დაჭრა. შსს-ს ინფორმციით, კაცი დაკავებულია.

ამავე თემაზე: