16 მაისს სასამართლომ მთავარი არხის დამფუძნებელი, ნიკა გვარამია დამნაშავედ ცნო და 3 წლითა და 6 თვით პატიმრობა მიუსაჯა. კრიტიკული მედიების წარმომადგენლებმა, სამოქალაქო საზოგადოებამ, საერთაშორისო პარტნიორებმა, ადგილობრივმა და საერთაშორისო არასამთავრობო ორგანიზაციებმა სასამართლოს გადაწყვეტილება პოლიტიკურად მოტივირებულად მიიჩნეს.

პარალელურად გააქტიურდნენ სახელისუფლებო ტროლები, ანონიმური და ანტილიბერალური გვერდები. ისინი გვარამიას და მთავარი არხის ჟურნალისტების დისკრედიტაციას ცდილობენ. მათი რიტორიკა ნაწილობრივ იმეორებ ქართული ოცნების მესიჯბოქსებს.

ამას მითების დეტექტორის კვლევაც ადასტურებს. ორგანიზაციამ მადისკრედიტირებელ კამპანიაში ჩართული 16 ყალბი ანგარიში და 16 Facebook გვერდი გამოავლინა. აქედან სამის, ქართული ჟურნალისტიკის მარგალიტების/journalist fails, პოლიტიკური აბსურდისა და არქივის პოსტები დასპონსოებულია. ორგანიზაციის განცხადებით:

16 Facebook გვერდიდან:

• 12 ანტიოპოზიციური და ქართული ოცნების მხარდამჭერია;
• 4 ანტილიბერალური და კრემლისტური;
• 3 ახალი შექმნილია.

16 ყალბი ანგარიშიდან:

• 14 სხვადასხვა სოციალურ ქსელის მომხმარებლისა და სხვა ცნობილი ადამიანების იდენტობას იპარავს;
• 2 იდენტობას მალავს;
• 4 ახალი შექმნილია;
• 8 Facebook ანგარიშს მოწონებული აქვს მთავრობის მხარდამჭერი და ოპოზიციის მადისკრდიტირებელი ფეისბუკ გვერდები;
• 8 Facebook ანგარიში მთავრობის მხარდამჭერ და ოპოზიციის მადისკედიტირებელ კამპანიებში ადრეც იყო ჩართული.

Facebook გვერდები

მთავარი არხის დამფუძნებლის დაკავების შემდეგ, ზოგიერთი ქართული ოცნების მხარდამჭერი და ანტიოპოზიციური, ასევე, ანტილიბერალური და კრემლისტური Facebook გვერდები დისკრედიტაციის კამპანიაში ჩაერთვნენ და ნიკა გვარამიას შესახებ სატირულ პოსტებსა და შეურაცხმყოფელ ილუსტრაციებს ავრცელებდნენ.

MDF-ის ინფორმაციით, გვარამიას მადისკრედიტებელი პოსტები Facebook გვერდებზე პოლიტიკური აბსურდი დასპონსორებულია — თანხას ნათელა კილაძე იხდის. ის ფულს ჟურნალისტების საწინააღმდეგოდ შექმნილი გვერდის, ქართული ჟურნალისტიკის მარგალიტები/journalist fails პოსტების დასპონსორებაშიც ხარჯავს. დასპონსორებულია არქივი ის პოსტებიც, რომლებიც გვარამიას სხვადასხვა დროინდელ განცხადებებს აერთიანებს.

ორგანიზაციის განმარტებით, გვარამიას დისკრიმინაციის მიზნით, ჰომოფობიური მოტივით, ფოტომანიპულაციაც გაავრცელეს. რომელშიც თითქოს გვარამია და გაბუნია ერთმანეთს კოცნიან. ფოტო 2021 წელს მითების დეტექტორმა გადაამოწმა და დაამტკიცა, რომ რეალურ კადრზე გვარამიასა და გაბუნიას შორის ჟურნალისტი ანა ასათიანი დგას.

გარდა ამისა, ვრცელდებოდა გაბუნიასა და სხვა ჟურნალისტების დამცინავი ილუსტრაციები და ვიდეოები.

მითების დეტექტორის მიერ, ახლად შექმნილი გვერდებს შორისაა პოლიტიკური სამარე, მიშინგი და ალტ-meme. მათზე ძირითადად, მიხეილ სააკაშვილის, ნაციონალური მოძრაობის წევრებისა და მთავარ არხთან დაკავშირებული პირების მადისრედიტირებელი პოსტები ქვეყნდება. ალტ-meme კი ანტილიბერალური Facebook გვერდია და ალტ-ინფოსთან აქვს კავშირი.

ყალბი ანგარიშები

ყალბი ანგარიშები სხვადასხვა მედიის მიერ გავრცელებული სიახლეების ქვეშ გვარამიას დაკავების გამო კმაყოფილებას გამოხატავდნენ და წერდნენ, რომ, როგორც იქნა, სამართალი აღსრულდა და ის უკვე დიდი ხნის დაჭერილი უნდა ყოფილიყო.

მითების დეტექტორის გამოვლენილი ერთ-ერთი ანგარიში წერდა, რომ "სექტა" და მასთან დაკავშირებული პირები ხელისუფლებისგან შორს უნდა ყოფილიყვნენ. ასევე, პოლონეთის საგარეო უწყების განცხადების შესახებ უკმაყოფილებას გამოხატავდა და ამტკიცებდა, რომ გვარამიას დაკავებას პოლიტიკური სარჩული არ ჰქონია.

ეს პირველი შემთხვევა არ არის, როდესაც პროსახელისუფლებო და ანტილიბერალური გვერდები კრიტიკული მედიებისა და ოპოზიციის წარმომადგენლების დისკრედიტაციას ცდილობენ. ისინი ძირითადად აქტიურდებიან მაშინც, როცა მთავრობას კრიზისული სიტუაცია აქვს და მმართველი გუნდის ნარატივებს ატარებენ.

წაიკითხეთ ჩვენი სტატიები მსგავს თემაზე და გაიგეთ მეტი:

• პროსახელისუფლებო და პრორუსი ტროლები ზელენსკის მხარდამხარ აშავებენ
• რეალური მხარდაჭერა თუ ფარული სამთავრობო კამპანია ფეისბუქზე
• ანონიმური ქართული ფეისბუქგვერდების წინასაარჩევნო კამპანია ოპოზიციისა და ოცნების წინააღმდეგ