ჟურნალისტთა დაცვის კომიტეტი (CPJ) აცხადებს, რომ საქართველოს ხელისუფლებამ უნდა გაათავისუფლოს ნიკა გვარამია და მისცეს მას და საქართველოში მედიის ყველა სხვა წევრს თავისუფლად მუშაობის საშუალება.

"საქართველოს ხელისუფლებამ დაუყოვნებლივ უნდა დაიწყოს გვარამიას საქმის განხილვა, თავი შეიკავოს ოპოზიციურად განწყობილი პრესის შევიწროებისგან და გადადგას კონკრეტული ნაბიჯები, რათა აჩვენოს, რომ მზადაა პატივი სცეს მედიის მრავალფეროვნებას", — თქვა CPJ-ის ევროპისა და ცენტრალური აზიის პროგრამის კოორდინატორმა ნიუ-იორკში, გულნოზა საიდმა.

CPJ წერს, რომ კომენტარისათვის მიმართეს საქართველოს პროკურატურასა და იუსტიციის სამინისტროს, მაგრამ პასუხი არ მიუღიათ.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: