5 არასამთავრობო ორგანიზაციის ერთობლივ განცხადებაში ნათქვამია, რომ ბოლო დროს, შემაშფოთებელ ფორმებს იღებს სამოქალაქო აქტივისტთა მიმართ სამართალდამცავების ქმედებები. ასე გამოეხმაურნენ NGO-ები სირცხვილიას დირექტორის, გიორგი მჟავანაძის დაკავებასა და შესაძლო, არასათანადო მოპყრობას.

ორგანიზაციები მოვუწოდებენ სპეციალურ საგამოძიებო სამსახურს დროული და ეფექტიანი გამოძიებისკენ.

"ბოლო დროს, შემაშფოთებელ ფორმებს იღებს სამოქალაქო აქტივისტთა მიმართ სამართალდამცავების ქმედებები. თვითნებურად და დაუსაბუთებელად შეფარდებული ადმინისტრაციული სახდელების მიღმა, უკიდურესად პრობლემურია ის ძალადობრივი და აგრესიული ფორმები და მეთოდები, რომლებსაც პოლიცია იყენებს აქტივისტების თუ რიგითი მოქალაქეების წინააღმდეგ.

ადამიანის უფლებების დაცვის ნაცვლად, პოლიცია ხშირად, თავად გვევლინება ადამიანის ღირსებისა და მისი უფლებების დამრღვევად, რაც არსებითად უთხრის ძირს საზოგადოებაში სამართალდამცავი სისტემის მიმართ ნდობას. პრობლემას ამძაფრებს პოლიციაში გავრცელებული დაუსჯელობის სინდრომიც, რისი მთავარი ფაქტორიც სამართალდამცავების მიერ ჩადენილი დანაშაულის გამოუძიებლობაა", — ვკითხულობთ განცხადებაში.

ხელმომწერი ორგანიზაციები არიან:

  • საქართველოს დემოკრატიული ინიციატივა (GDI);
  • ადამიანის უფლებათა ცენტრი (HRC);
  • სოციალური სამართლიანობის ცენტრი (SJC);
  • უფლებები საქართველო (RG);
  • საქართველოს ახალგაზრდა იურისტთა ასოციაცია (GYLA).

სირცხვილიას დირექტორი 17 მაისს გლდანი-ნაძალადევის მე-9 განყოფილებაში დააკავეს და ზაჰესში, დაკავების იზოლატორში გადაიყვანეს. On.ge-ს შინაგან საქმეთა სამინისტროში განუცხადეს, რომ აქტივისტი ადმინისტრაციულ სამართალდარღვევათა კოდექსის 173-ე მუხლით დააკავეს.

მჟავანაძე ჰყვება დაკავების დეტალებს და ამბობს, რომ პოლიციელებმა სიტყვიერი და ფიზიკური შეურაცხყოფა მიაყენეს. აქტივისტის თქმით, განყოფილებაში მის სახელზე მისული წერილის ასაღებად მივიდა და ელოდებოდა, როცა პოლიციელმა ჰკითხა, რატომ იმყოფებოდა იქ, მან უპასუხა, რომ "ვიღაც" პოლიციელმა დაურეკა, რამაც გაღიზიანება გამოიწვია. მისივე თქმით, გარეთ მოცდა მოსთხოვეს, რაზეც უპასუხა, რომ შენობა მათ არ ეკუთვნით, ხალხისაა და ჰქონდა იქ ყოფნის უფლება.