პარლამენტის საგარეო ურთიერთობათა კომიტეტის თავმჯდომარის, ნიკა სამხარაძის განცხადებით, ირაკლი ღარიბაშვილისა და იენს სტოლტენბერგის შეხვედრა NATO-ს გენერალური მდივნის ჯანმრთელობის მდგომარეობის გამო გაუქმდა.

"ჩემი ინფორმაციით, ამ შეხვედრის გაუქმების, გადადების მიზეზი არის ბატონი სტოლტენბერგის ჯანმრთელობის მდგომარეობა. მოგეხსენებათ, მას ჰქონდა კოვიდი და ამის გამო მან ვერ მიიღო მონაწილეობა ძალიან მნიშვნელოვან შეხვედრებში წინა კვირაში და ამ კვირის დასაწყისშიც.

შესაბამისად, ერთადერთი შეხვედრა, რომელიც მას ჰქონდა, ეს იყო ფინეთისა და შვედეთის წარმომადგენლებთან, რომლებმაც დღეს ოფიციალურად შეიტანეს განაცხადი NATO-ს წევრობაზე. ამ შეხვედრის გარდა ყველა სხვა დანარჩენი შეხვედრა გაუქმდა. ეს არის ინფორმაცია, რომელიც მე მაქვს, ჩვენი საელჩოდან", — აცხადებს ის.

სამხარაძის თქმით, ამ შეხვედრის გაუქმების მიზეზი არანაირი შიდა პოლიტიკური მოვლენა არ შეიძლება, რომ ყოფილიყო.

ბრიუსელში საქართველოს პრემიერმინისტრის, ირაკლი ღარიბაშვილისა და NATO-ს გენერალური მდივნის, იენს სტოლტენბერგის შეხვედრა გაუქმდა. ინფორმაცია ამის შესახებ NATO-ს ოფიციალურ ვებსაიტზე იძებნება, თუმცა დეტალები განხილული არ არის.