სხვადასხვა მედიის წარმომადგენლები მთავარი არხის დირექტორის, ნიკა მელიას საკითხზე ამერიკის შეერთებული შტატების ელჩს საქართველოში, კელი დეგნანს შეხვდნენ. მათ შეხვედრის დეტალებზე არ უსაუბრიათ, თუმცა აღნიშნეს, რომ მოლოდინი და განწყობა პოზიტიურია.

ფორმულას ჟურნალისტმა, ნინო ჟიჟილაშვილმა მედიასთან განაცხადა, რომ ნიკა გვარამიას წინააღმდეგობის მიუხედავად, ისინი აპირებენ პრეზიდენტს შეწყალების მოთხოვნით მიმართონ.

"უახლოეს ხანებში, უახლოეს საათებში მივმართავთ ქვეყნის პრეზიდენტს, სალომე ზურაბიშვილს, რომ დაგვდოს პატივი და შეგვხვდეს მედიის წარმომადგენლებს. ჩვენ მას ვთხოვთ, რომ გამოიყენოს თავისი უფლება ნიკა გვარამიას შეწყალებასთან დაკავშირებით. არ ვიცი თვითონ ნიკას რა რეაქცია ექნება ამის შესახებ, მან ითხოვა, რომ ჩვენ ეს არ გაგვეკეთებინა, მაგრამ ჩვენ მივიჩნევთ, რომ ახლა ყველა რესურსი უნდა გამოვიყენოთ", — განაცხადა მან.

TV პირველის დირექტორმა, ვატო წერეთელმა ზურაბიშვილს თავის კოლეგებთან ერთად შეხვედრას შესთავაზა. მთავარი არხის დირექტორის მოვალეობის შემსრულებლის, გიორგი გაბუნიას თქმით კი, ისინი გვარამიას გადაწყვეტილებას პატივს სცემენ, ამიტომ მთავარი არხი ზურაბიშვილისთვის შეწყალების მოთხოვნით მიმართვას არ აპირებს.

"იცით, ნიკას დამოკიდებულება, მე პატივს ვცემ მის გადაწყვეტილებას, ამიტომ მთავარი არხი ამ მიმართვას სალომე ზურაბიშვილისადმი არ ვუერთდებით. როგორიც არ უნდა იყოს ჩვენი პირადი დამოკიდებულება, ჩვენ პატივს ვცემთ ნიკას გადაწყვეტილებას", — ამბობს გაბუნია.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: