უკრაინის თავდაცვის მინისტრის, ალექსეი რეზნიკოვის განცხადებით, მარიუპოლის მცველებს სიცოცხლის გადარჩენა დაევალათ.

"მათ ახლა ახალი ბრძანება აქვთ — მათი სიცოცხლის გადარჩენა. უკრაინას ისინი სჭირდება. ესაა მთავარი", — აცხადებს რეზნიკოვი.

მისი თქმით, ბრძანება იყო 20 000-მდე რუსი ოკუპანტის შეკავება, რათა ისინი არ შეეშვათ ზაპოროჟიეში, არ გაეშვათ დონეცკის რეგიონს იქით, ასევე, კიევიდან გაეყვანათ ძალები, რაც შესრულდა, ამიტომ ყველა მათგანი გმირია.

"დღეს ძალიან რთული და მნიშვნელოვანი პროცესები მიმდინარეობს, მათ შორის, მოლაპარაკებები წითელი ჯვრის საშუალებით. შედეგია დაჭრილებისა და მძიმედ დაჭრილების ევაკუაცია, რომლებიც მძიმე მდგომარეობაში არიან. ჩვენი გეგმაა მათი სიცოცხლისა და თავისუფლების გადარჩენა", — აცხადებს თავდაცვის მინისტრი.

დღეს აზოვის ბატალიონის მეთაურმა, დენის პროკოპენკომ განაცხადა, რომ უმაღლესი სამხედრო სარდლობის მიერ დამტკიცებულ გადაწყვეტილებას ასრულებდნენ და ხალხის მხარდაჭერის იმედი ჰქონდათ. მას დეტალებზე არ უსაუბრია, თუმცა მოგვიანებით Reuters-მა დაწერა, რომ მათი ინფორმაციით, აზოვსტალი რამდენიმე ათეულმა ავტობუსმა დატოვა, სადაც, სავარაუდოდ, სამხედროები იმყოფებოდნენ.

16 მაისს რუსეთის თავდაცვის სამინისტრომ განაცხადა, რომ აზოვსტალის ქარხნიდან დაჭრილი უკრაინელი ჯარისკაცების ევაკუაციაზე შეთანხმდნენ. უკრაინულ მხარეს ამასთან დაკავშირებით კომენტარი არ გაუკეთებია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში