თბილისის მერის, კახა კალაძის განცხადებით, კანონზე მაღლა ვერავინ დადგება და "მედიაში მუშაობის სტატუსი" ვერ შეაჩერებს სამართლებრივ მოქმედებებს. ასე ეხმაურება ის მთავარი არხის დირექტორის, ნიკა გვარამიას დაკავებას.

"კანონის წინაშე ვართ ყველა თანასწორუფლებიანი. კანონზე მაღლა ვერავინ და ვერაფერი ვერ დადგება. შესაბამისად, როდესაც შენ ჩადიხარ დანაშაულს, ვერც პოლიტიკოსის სტატუსი, ვერც მედიაში მუშაობის სტატუსი, რა თქმა უნდა, ვერ შეაჩერებს იმ სამართლებრივ მოქმედებებს, რაც საჭიროა დანაშაულის ჩადენის შემდეგ", — აცხადებს ის.

სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

რაც შეეხება ქართულ ოცნებას, ირაკლი კობახიძემ აღნიშნა, რომ 2017 წელს რუსთავი 2-ის საქმეზე საელჩოების განცხადებებმა ნიკა გვარამიას შესაძლებლობა მისცა, რამდენიმე მილიონით დამატებით გაეძარცვა არხი.